ބާންލީ އަތުން އާސެނަލްއަށް ޕޮއިންޓެއް

އިނގިރޭސި ޕްރިމިއާ ލީގުގައި ރޭ އާސެނަލް ކުޅުނު މެޗުން ބާންލީއާ 1-1 އިން އެއްވަރު ވެއްޖެއެވެ.

ބާންލީ ދަނޑުގައި ރޭ ކުޅުނު މެޗުގެ ހަ ވަނަ މިނިޓްގައި އާސެނަލަށް ލީޑުނަގައިދިނީ އެ ޓީމުގެ ކެޕްޓަން ޕިއޭ އެމެރިކް އޮބާމަޔަން އެވެ. މެޗުގެ 39 ވަނަ މިނިޓްގައި ބާންލީން އެއްވަރުކުރި ގޯލު ޖެހީ ކްރިސް ވުޑް އެވެ.

އިތުރު ގޯލެއް ޖަހައި މެޗުން މޮޅުވާން އާސެނަލުން ގިނަ މަސައްކަތްތަކެއް ކުރި ނަމަވެސް ކާމިޔާބެއްނުވި އެވެ. އޭރިއާތެރެއިން ބާންލީގެ އެރިކް ޕިޓާސް އަތުގައި ބޯޅައިން ޖެހުމުން އާސެނަލުން ޕެނަލްޓީ އަކަށް އެޕީލްކުރި ނަމަވެސް ރެފްރީ ނިންމީ އެއީ ޕެނަލްޓީއެއް ނޫންކަމަށެވެ.

އާސެނަލް ލީގުގެ 10 ވަނައިގައި އޮތީ 27 މެޗުން 38 ޕޮއިންޓާ އެކުއެވެ.