އިންޑިއާގެ ދަނޑުވެރިކަމުގެ ސިނާއަތު އަލުން އިސްލާހުކުރުމަށް ބޮޑުވަޒީރު މޯޑީގެ ސަރުކަރުން ފާސްކޮށްފައިވާ ގާނޫނޫތަކާ ދެކޮޅަށް، މެދުނުކެޑި މުޒާހިރާ ކުރާތާާ 100 ދުވަސް ފުރުން ފާހަގަ ކުރުމުގެގޮތުން، ވެރިރަށް ދިއްލީގެ ރައްބޭރުގައި އޮންނަ، 6 ލޭން އެކުލެވޭ ދިގު އެކްސްޕްރެސްވޭއެއް، އެއްގަމު އުޅަދު ނުދުއްވޭ ގޮތަށް ދަޑުވެރިން ބަންދު ކޮށްފިއެވެ.

މެދުނުކެޑި މުޒާހިރާ ކުރާތާ 100 ދުވަސް ފުރުން ފާހަގަ ކުރުމުގެ ގޮތުން، މި އެކްސްޕްރެސްވޭ ދަނޑުވެރިން ބަންދުކުރީ، އެމީހުންގެ ޑިމާންޑުތައް ބަލައިގަތުމަށް އިންޑިއާގެ ބޮޑުވަޒީރު ނަރެންދުރަ މޯޑީއަށް ޕްރެޝަރ ކުރުވުމުގެ ގޮތުންނެވެ.

ފާއިތުވެދި އަހަރުގެ ސެޕްޓެމްބަރމަހު އިންޑިއާގެ ގާނޫނު ހަދާ މަޖިލހުން ފާސްކޮށްފައިވާ 3 ގާނޫނަކާ ދެކޮޅު ހަދަމުންދާ، އެކި އުމުރުގެ ދަނޑުވެރިން، 5 ގަޑިއިރަށް މި ދިގު ހައިވޭ ބަންދު ކުރުމަށްޓަކާ ދަތުރު ކޮށްފައިވަނީ، ލޮރީ ޕިކަޕްގެ އިތުރުން، ޓްރެކްޓަރތަކާއި ކާރު ތަކުގައެވެ.

ދަނޑުވެރިން ބުނަމުންދަނީ، އިންޑިއާގެ ގާނޫނުހަދާ މަޖިލުހުން ފާސްކޮށްފައިވާ މި 3 ގާނޫނުގެ ސަބަބުން އެމީހުންގެ ދިރިއުޅުންތައް ބަގުރޫޓުވެ، ދަނޑުވެރިކަމުގެ ސިނާއަތު މިހާރަށްވުރެ ބޮޑަށް ހުޅުވިގެންދާނީ، އަމިއްލަ ބޮޑެތި ކުންފުނިތަކަށް ކަމުގައެވެ.

އިންޑިއާގެ ބޮޑުވަޒީރު ނަރެންދުރަ މޯޑީ ވިދާޅުވެފައިވަނީ، އެގައުމުގެ ދަނޑުވެރިކަމުގެ ސިނާއަތް ޒަމާނީކޮށް، މިހާރުން މިހާރަށް ގެންނަންޖެހޭ މުހިންމު ބަދަލުތައް ގެނައުމަށްޓަކާ އިސްލާހު ކުރަންޖެހޭ ކަމުގައެވެ. އަދި، މިބަދަލުތަކާއި ގުޅިގެން ކުރިޔަށްދާ މުޒާހިރާތަކަކީ ސިޔާސީ މުޒާހިރާތަކެއްގެ ގޮތުގައި މޯޑީ ވަނީ ސިފަ ކުރައްވާފައެވެ.

"މޯޑީވަނީ، މި ކުރިޔަށްދާ މުޒާހިރާތަށް އޭނާގެ އަމިއްލާ ޒާތީ ކަމަކަށް ހަދާފަ. ދަނޑުވެރިންގެ އިހުސާސްތައް އެމީހުން ނުދަނޭ،" ޕަންޖާބު ސްޓޭޓަށް ނިސްބަތްވާ، އުމުރުން 68 އަހަރުގެ ދަނޑުވެރިއެއް ކަމަށްވާ އަމަރުޖީތު ސިންގ ރޮއިޓަރސް ނިއުސް އޭޖެންސީއަށް މައުލޫމާތު ދެމުން ބުނެފައި ވެއެވެ.

"އެމީހުން އަހަރެމެންނަށް ދައްކާފައިވާ ހަމައެކަނި މަގަކީ މުޒާހިރާ ކުރުން."

އިންޑިއާގެ ގާނޫނު ހަދާ މަޖިލިހުން ފާސްކޮށްފައިވާ، އެހެންނަމަވެސް މިހާރު އަމަލުކުރުން ފަސް ކޮށްފައިވާ މިގާނޫނުތައް އުވާލުމަށް އަޑު އުފުލަމުންދާ، އެގައުމުގެ އުތުރުގެ ސްޓޭޓްތަކަށް ނިސްބަތްވާ އެތައް ހާސް ދަނޑުވެރިންނެއް ދަނީ، ފާއިތުވެދިޔަ އަހަރުގެ ޑިސެމްބަރު މަހުންފެށިގެން، ވެރިރަށް ނިއުދިއްލީގެ ރަށްބޭރުގެ ސަރަހައްދުތަކުގައި ކޭމްޕްތައް ޖަހައިގެން، ގަދަ ފިނީގައިވެސް މުޒާހިރާ ކުރަމުންނެވެ.

ފާއިތުވެދިޔަ ތަނުގައި، ދަނޑުވެރިންގެ މިހަރަކާތަށް ބައިނަލް އަގުވާމީ ސަމާލުކަންވަނީ ވަރަށް ބޮޑަށ ހުއްޓިފައެވެ. އަދި ދުނިޔޭގެ މަޝްހޫރު ބައެއް ތަރިންނާ ބައެއް ޝަޚުސިއްޔަތުތަކުގެ އެހީތެރިކަން ދަނޑުވެރިންނަަށް ވަނީ ލިބެން ފަށާފައެވެ. މީގެތެރޭގައި، މޫސިމީ ކަންކަމުގައި މަޝްހޫރު އެކްޓިވިސްޓު ގްރެޓާ ތަންބާގްއާއި އެމެރިކާގެ މަޝްހޫރު ލަވަ ކިޔުންތެރިއާ ރިހަންނާވެސް ހިމެނެއެވެ.

ދަނޑުވެރިންގެ ކަންބޮޑުވުންތައް ހައްލު ކުރުމަށް އިންޑިއާ ސަރުކާރުގެ އިސްވެރިންނާ މުޒާހިރާގެ ލީޑަރުންނާ ދެމެދު ބޭއްވުނު ވާހަކަތަަކަށް މިހާތަނަށް ވަނީ ނާކާމިޔާބު ވެފައެވެ.

މުޒާހިރާ ކުރަމުންދާ ފަރާތްތަކަށް މޯޑީގެ ސަރުކާރުންވަނީ ފާއިތުވެދިޔަ ތަނުގައި ވަރަށް ބޮޑަށް ފާޑު ކިޔާފައެވެ. އަދި އިންސާނީ ހައްގުތަކަށް މަސައްކަތްކުރާ ފަރާތްތަކުންވަނީ، މުޒާހިރާތައް ހުއްޓުވުމަށް، މޯޑީގެ ސަރުކާރުން އާދަޔާ ޚިލާފަށް ބާރުގެ ބޭނުންކޮށް، އަދި ހާލަތާ ނުގުޅޭ ނުފޫޒުގެ ބޭނުން ކުރަމުންދާ ކަމަށް ތުހުމަތުކޮށް އިންޑިއާ ސަރުކާރަށް ވަރަށް ބޮޑަށް ފާޑު ކިޔާފައެވެ.

ފާއިތުވެދި 4 ވަރަކަށް މަސްދުވަހު ހުއްޓުމެއްނެތި ކުރިޔަށް ގޮސްފައިވާ މި މުޒާހިރާތައް ޖުމްލަ ގޮތެއްގައި ސުލްހަވެރިކަމާއެކު ކުރިޔަށް ގޮސްފައިވި ނަމަވެސް، ފާއިތުވެދިޔަ ޖެނުއަރީމަހު 26 ވަނަދުވަހު، މުޒާހިރާގެ ބައިވެރިންނާ ފުލުހުންނާ ދެމެދު ހިގި ހަމަނުޖެހުންތަކުގައި 1 ވަނީ މަރުވެފައެވެ. އަދި މި ހަމަނުޖެހުންތަކަށްފަހު، އިންޑިއާ ސަރުކާރުންވަނީ، އެދުވަހުގެ ޚަބަރުތައް އޮޅުވާލައިގެން ގެނެސްދީ، ހަމަނުޖެހުންތަކަށް ހިތްވަރު ދިންކަމުގެ ތުހުމަތުގައި 8 ނޫސްވެރިއަކާ ދެކޮޅަށް ޖިނާއީ ތުހުމަތުކޮށް، ދައުވާ އުފުލުމަށް ނިންމާފައެވެ.