ބޮލީވުޑްގެ ތަރި ޖާންވީ ކަޕޫރުގެ އުފަންދުވަހާ ގުޅުވައިގެން މީގެކުރިން ބެލުންތެރިންނަށް ފެނިފައި ނުވާ އޭނާގެ ވީޑިއޯއެއް ވަނީ އާންމުވެފައެވެ. މި ވީޑިއޯ ހިއްސާކޮށްފައިވަނީ ޖާންވީގެ ކޮއްކޮ ޚުޝީ ކަޕޫރެވެ.
ޖާންވީގެ އުފަންދުވަހުގެ ޕޯސްޓެއްގެ ގޮތުން ހިއްސާ ކޮށްފައިވާ މި ވީޑިއޯއިން ފެނިގެން ދާނީ ޖާންވީގެ ވަރަށް ކުޑައިރެވެ. އެގޮތުން ނިދާ ހެދުމުގައި ގޭގެ ސިޓިން ރޫމުގައި ނަށާ މަންޒަރު މި ވީޑިއޯއިން ފެނިގެން ދެއެވެ. އަދި މި ވީޑިއޯގައި ޖާންވީގެ ފަހަތުގައި ކުޑަ ކުއްޖެއް އުރައިގެން ހުރި ނޭނީވެސް ފެނެއެވެ. ލަފާ ކުރެވޭ ގޮތުގައި އެ ކުޑަ ކުއްޖާއަކީ ޚުޝީ އެވެ.
މި ވީޑިއޯ ހިއްސާ ކުރަމުން ޚުޝީ ޖަހާފައިވަނީ "މައި އެވްރިތިންގ" ނުވަތަ "އަހަރެންގެ ހުރިހާވެސް އެއްޗެއް" މިހެންނެވެ. މި ވީޑިއޯއާ އެއްކޮށް ޚުޝީވަނީ އޭނާ އާއި ޖާންވީގެ ފޮޓޯއެއް ހިއްސާކޮށްފައެވެ. އަދި މިފޮޓޯއަށް ވަނީ ވަރަށް ގިނަ ބެލުންތެރިންގެ ލައިކާއި ކޮމެންޓުތައް ލިބިފައެވެ.
View this post on Instagram
ޖާންވީއަށް މިއަހަރު ފުރިފައި ވަނީ 24 އަހަރެވެ. ނަމަވެސް އޭނާ މީގެކުރިން ބުނެފައި ވަނީ އޭނާ މިއަހަރު ފާހަގަކުރާނީ އޭނާގެ 23 ވަނަ އުފަންދުވަސް ކަމަށެވެ. ސަބަބަކީ މިދިޔަ 2020 ވަނަ އަހަރު އޭނާގެ ހަޔާތުން އޭނާ ފުހެލާފައި ވާތީއެވެ.
ޚުޝީ ދާދިފަހުންވަނީ މުމްބާއީ އެއާޕޯޓުން ފެނިގެންގޮސްފައެވެ. އޭނާ ހުރީ މާސްކެއް އަޅައިގެންނެވެ. އަދި އެލާޖީއެއްގެ ސަބަބުން މޫނު ރަތްވެފައި ހުރުމުގެ ސަބަބުން މާސްކު ނެގުމަށް އޭނާ ވަނީ އިންކާރުކޮށްފަ އެވެ.
ޖާންވީގެ މަސައްކަތުގެ ދާއިރާއަށް ބަލައިލާއިރު އޭނާ ދެން ފެނިގެން ދާނީ މިހަފްތާގެ ބުރާސްފަތި ދުވަހު ސިނަމާތަކަށް އަންނަ ހިންދީ ފިލްމު "ރޫހީ" އިންނެވެ. މި ފިލްމުން ޖާންވީގެ އިތުރުން ރާޖް ކުމާރް ރާއޯ އަދި ވަރުން ޝަރްމާވެސް ފެނިގެންދާނެއެވެ. މި ފިލްމުގެ ލަވަ "ނަދިޔޯ ޕާރް" އިން ޖާންވީގެ ވަރުގަދަ ނެށުމުގެ ހުނަރު ވަނީ ބެލުންތެރިންނަށް ދައްކާލާފައެވެ.
