ނިކް ޖޯނަސް ޕްރިޔަންކާގެ ކައިވެންޏަށް އެދި ކުރި ސުވާލުގެ ޖަވާބު ދިނުމަށް ޕްރިޔަންކާ ބަރާބަރު 45 ސިކުންތު ނެގިކަން އިނގޭ ހެއްޔެވެ؟
ނިކް ޖޯނަސް އާއި ޕްރިޔަންކާ ޗޯޕްރާގެ ސަޕޯޓަރުން ހައިރާން ކޮށްނުލާ ދުވަހެއް މަދުވާނެއެވެ. 2018 ވަނަ އަހަރު ވަރަށް މަދު ދުވަސްކޮޅަކު ރައްޓެހިވެގެން އުޅުމަށް ފަހު ކައިވެނި ކުރުމަށް ނިންމުން މިއީ ވެސް ހަމަ މިފަދަ ކަމެކެވެ. ނިކް ވަނީ ބްލޭކް ޝެލްޓަން އާއި އެއްކޮށް އެރި އިންޓަވިއުއެއްގައި، އެ ދެމީހުންގެ ގުޅުމުގެ ވަރަށް ގިނަ ވާހަކަތައް ހިއްސާކޮށްފަ އެވެ.
މި އިންޓަވިއުގައި ވާހަގަ ދައްކަމުން ނިކް ބުނެފައިވާ ގޮތުގައި އޭނާގެ ޕޮރޮޕޯސަލް އަށް ޖަވާބުދޭން ޕްރިޔަންކާ 45 ސިކުންތު ނެގިކަމަށެވެ. މި ވާހަކަ އަޑު އިވުމުން ބެލުންތެރިންގެ އިތުރުން ބްލޭކްވެސް ވަނީ ހައިރާންވެފައެވެ.
ބްލޭކް ބުނީ އެއީ ވަރަށްވެސް "ބްރޫޓަލް" ނުވަތަ އަސަރުގަދަ ބުނެދޭންވެސް ނޭނގޭފަދަ އިހުސާސެއް ކަމަށެވެ. މި އިންޓަވިއުގައި ބްލޭކްވަނީ އޭނާގެ އަމިއްލަ ޕްރޮޕޯސަލްގެ ވާހަކަވެސް ދައްކާފައެވެ. އެގޮތުން އޭނާ ބުނެފައިވަނީ އެކަމުގެ އެއްވެސް ކަހަލަ ހަނދާނެއް މިހާރު ނުވާ ކަމަށެވެ.
މީގެ ކުރިން ދިން އިންޓަވިއުއެއްގައި ޕްރިޔަންކާ ބުނެފައިވަނީ އޭނާ 45 ސިކުންތު ނެގީ ހައިރާންވީވަރު ބޮޑުކަމުން ކަމަށެވެ. މިދިޔަ އަހަރުގެ ޑިސެމްބަރުގައި މި ދެމީހުންގެ ކައިވެންޏަށް ވަނީ ދެ އަހަރު ފުރިފައެވެ. އެހެންނަމަވެސް މިކަން ފާހަގަ ކުރަން ޖެހުނީ މި ދެމީހުން ދުރުގައި ތިބެގެންނެއެވެ. އެ ދުވަސްވަރު ޕްރިޔަންކާ ހުރީ ލަންޑަނުގައެވެ. އަދި ނިކް ހުރީ އެމެރިކާގަ އެވެ.
