ބޮލީވުޑްގެ ކާމިޔާބު އަސަރުގަދަ ފިލްމް ބްލެކްގައި އަމީތާބް ބައްޗަން މަސައްކަތްކޮށްދީފައި ވަނީ އެއްވެސް އަގެއް ނުނަގާ މުޅިން ހިލޭ ކަމަށް އަމީތާބް ބުނެފި އެވެ.
2005 ވަނަ އަހަރުގެ މި ފިލްމަކީ ގިނަ ބެލުންތެރިންނާއި، އިންޑިއާ އާއި އެގައުމުން ބޭރުގެ ވެސް އެތައް ގިނަ ފިލްމް ކްރިޓިކްސްގެ ތަޢުރީފް އޮހިފައިވާ ފިލްމެކެވެ.
ކާމިޔާބު ޑައިރެކްޓަރ ސަންޖޭ ލީލާ ބަންސާލީގެ މި ފިލްމު އަމީތާބް މުޅިން ހިލޭ ކުޅެދިން މައިގަނޑު ސަބަބު ކަމަށް އަމީތާބް އޭނަގެ އަމިއްލަ ބްލޮގްގައި ބުނެފައި ވަނީ ސަންޖޭގެ ކުޅަދާނަ މަސައްކަތުގެ އަގުވަޒަންކޮށް އޭނާގެ އެ މަސައްކަތަަށް އެއްބާރުލިން ދިނުމެވެ.
"ސަންޖޭގެ މަސައްކަތްތައް ފެނިފަ ހަމަ އަހަރެން ބޭނުންވީ އޭނާގެ މަސައްކަތަށް ހިތްވަރުދީ އެއްބާރުލުން ދިނުމުގެ ގޮތުން މަސައްކަތްކޮށްލަން. އެފުރުސަތު ލިބުނު އިރު މި ލިބުނީ ވަަރަށް ބޮޑުކޮށް. އަހަރެން އެއްވެސް އަގެއް ނުނަގަން މި މަސައްކަތަށް"
– އަމީތާބް
އަމީތާބް ލީޑްރޯލުން ފެނިގެންދާ މި ފިލްމުގެ މަސައްކަތުގައި ހިއްސާވެލުން އެއީ ވެސް ވަރަށް ބޮޑު އަގެއް ކަމުގައި ދެކޭކަމަށް އަމީތާބް ވަނީ ބުނެފައެވެ. މިއިންވެސް ފިލްމު އިންޑަސްޓްރީއަށް އޭނާގެ އޮތް ލޯބި ދޭހަކޮށްދެއެވެ.
އަމީތާބާއެކު ލީޑުން ރާނީ މުކަރްޖީ ފެނިގެންދާ މި ފިލްމު ބިނާވެފައި ވަނީ ލޮލަށް ނުފެންނަ އަދި އަޑުނީވޭ އަންހެން ކުއްޖަކު ދުނިޔެއާ މުއާސަލާތު ކުރުމަށް މެދުވެރިއަކަށް ވާ އޭނަގެ ޓީޗަރާ މެދު އޮންނަ ގުޅުމުގެ މައްޗަށެވެ. އަސަރުގަދަ ވާހަކައެއްގެ މައްޗަށް ބިނާކޮށް ހަދާފައިވާ މި ފިލްމަކީ ބޮކްސް އޮފީހިގެ އިތުރުން އެވޯޑް ހަފްލާތަކުގައިވެސް ކާމިޔާބު ފިލްމެކެވެ.
