ކޮންމެ މީހަކީ ވެސް ރީތިކަމަށް ލޯބި ކުރާނެ މީހެކެވެ. މީހާގެ ރީތިކަން އެންމެ ބޮޑަށް ގުޅިފައި ވަނީ އޭނާގެ ގައިގެ ހަންގަނޑާއެވެ. ހަމުން އަލި ނޫނަސް އޮމާން ހަންގަނޑެއް ލިބިފައިވާނަމަ އެމީހަކީ ރީތި މީހެކެެވެ.
ކިތަންމެ ހަމުގެ ކުލަ އަލި ވިޔަސް އެމީހާގެ ހަނގަޑުގައި އޮމާން ކަމެއް ނެތި، އެކިކަހަލަ ބިއްސާއި، އޮށާޅަ ހުންނަ ނަމަ އެއީ ރީތި މީހެއް ކަމަށް ބެލޭނެ ޖާގައެއް ނޯންނާނެ އެވެ.
އޮމާން ރީތި ހަންގަނޑެއް ހޯދުމަށް ގިނަބަޔަކު ހިޔާރުކުރަނީ އަގުބޮޑެތި އެކި ޒާތްޒާތުގެ ކޮސްމެޓިކްސް އެވެ. ނަމަވެސް ބާޒާރުގައި ލިބެންހުންނަ މިފަދަ ގިނަ ބާވަތްތަކަކީ އެކިކަހަލަ ކެމިކަލްތައް ހިމަނައިގެން އުފައްދާފައި ހުންނަ ބާވަތްތަކެވެ. މިފަދަ ބާވަތްތައް ބޭނުންކޮށްގެން ފަހަރުގައި ވަގުތީ ރީތި ކަމެއް ނޫނީ އޮމާން ކަމެއް ހަންގަނޑަށް ލިބިދާނެއެވެ. ނަމަވެސް މިއީ ދާއިމީ ކަމަކަށް ނުވާނެއެވެ.
ދާއިމީ ރީތިކަމެއް ނުވަތަ އޮމާން ކަމެއް ހަންގަނޑަށް ބޭނުންނަމަ ގުދުރަތީ ފަރުވާއަށް އިސްކަން ދޭށެވެ. މިފަހަރު މި ހިމަނާލަނީ ފަސޭހައިން ލިބެންހުންނަ ތަކެތިން ކުޑަ ވަގުތުކޮޅެއްގެ ތެރޭ ހަންގަނޑަށް ދެވޭނެ ގުދުރަތީ ބައެއް ފަރުވާއެވެ.
1. ފެން ބުއިން
އޮމާން ރީތި ހަންގަނޑެއް ބޭނުންނަމަ ފެން ގަވާއިދުން ފެން ބުއިމަކީ މުހިންމު ކަމެކެވެ. ދިވާލެއްގެ ތެރޭ މަދުވެގެން 8 ތަށި ފެން ބުއިމަށް އާދަ ކުރާށެވެ. ހަށިގަނޑު ހައިޑްރޭޓްކޮށްދީ ހަށިގަނޑުގެތެރޭ އުފެދޭ ވިހަ އަދި ބޭކާރު މާއްދާތައް ބޭރުކޮށްލަން ފެނަކީ އެންމެ ރަނގަޅު ވަސީލަތެވެ. ހަންގަނޑުގެ އޮމާންކަން ދަމަހައްޓަން ހަށިގަނޑުގައި އުފެދޭ ބޭކާރު މާއްދާތައް ހަށިގަނޑުން ބޭރު ވާންޖެހެއެވެ.
2. ލުނބޯ ޖޫސް
ލުނބޯހުތަށް 1 ކުކުޅު ބިހުގެ ލޮނދި (ހުދުބައި) އެއްކޮށްލުމަށް ފަހު މޫނުގައި އުނގުޅާލާށެވެ. 10 މިނިޓު ފަހުން ނޫނު ފެންފޮދަކުން ދޮވެލާ ސާފުކޮށްލާށެވެ. ހަފްތާއަކު 2 ފަހަރު މިފަރުވާ ކޮއްލުމުން ހަންގަނޑުގެ އޮމާންކަން ފެންނާނެއެވެ.
3. ޓޮމާޓޯ
ތާޒާ ޓޮމާޓޯ ބްލެބްޑަރ އަކުން މުގުރާލައި، ޕޭސްޓް ގަނޑެއް ތައްޔާރުކޮށްލާށެވެ. މޫނުގައި މި ޕޭސްޓް އުނގުޅާލުމަށްފަހު 10 މިނިޓް ފަހުން ހަމަ އާދައިގެ ފެނުން ދޮވެލާށެވެ. މީގެ ޖާދޫ ޔަގީނުންވެސް ފެންނާނެއެވެ. ހަމައެކަނި ހަންގަނޑު އޮމާން ވުމަކުން ނޫނެވެ. ހަމުގެކުލަ އަލިވެސް ވާނެއެވެ.
4. މާމުއި
އެއްވެސް އެއްޗެއް އެއް ނުކޮށްހުރި ހަމަ ގުދުރަތީ މާމުއި މޫނާއި ކަރުދަށާއެއްކޮށް އުނގުޅާލާށެވެ. 10 މިނިޓް ފަހުން ފިނި ފެންފޮދަކުން ދޮވެލާށެވެ. ހަންގަނޑަށް މަޑުކަމާއި ފަސޭހަކަން އިހުސާސް ވާނެއެވެ.
5. އެލޯވެރާ
އެލޯވެރާ ފަތުގައި ހުންނަ ޖެލް ހަންގަނޑުގައި އުނގުޅާށެވެ. ކޮންމެ ދުވަހަކު ނޫނަސް ހަފްތާއަކު ދެތިން ފަހަރު މިކަން ކޮށްލާށެވެ. އޮމާން، މަޑު ހަންގަނޑެއް ބޭނުންނަމަ މިއަށްވުރެ ވަކި ރަނަގަޅު ގުދުރަތީ ފަރުވާއެއް ނެތެވެ.
6. ކެލައާއި ރީނދޫ
1 ސައިސަމުސާ ރީނދޫ ޕައުޑަރަށް 2 ސައިސަމުސާ ކެލާ އެއްކޮށްލުމަށްފަހު ޕޭސްޓް ގަނޑެއް ތައްޔާރުވާވަރަށް ފެންފޮދަކާއެކު ގަށާލާށެވެ. މި ޕޭސްޓް މޫނުގައި އުނގުޅާލުމަށްފަހު ރަނގަޅަށް ހިކެންދެން ބަހައްޓަން ވާނެއެވެ. ރަނގަޅަށް ހިކުމުން ދޮވެލާށެވެ. ހަންގަނޑު އޮމާންވެ، އަލިކަމާއި މަޑުކަން ގެނެސްދޭނެއެވެ.
