ރައްޔިތުންގެ މަޖިލީހުގެ އިދާރާގެ މުވައްޒަފުންނާއި މެންބަރުން މަޖިލީހަށް ވަޑައިގަންނަވާއިރު ތުއްޕުޅު ބޭފުޅުން ބެލެހެއްޓޭނެ އިންތިޒާމެއް އެ އިދާރާގައި ހަމަޖައްސައި ދެއްވައިފިއެވެ.
މަޖިލީހުގެ ޗެމްބަރުގައި ގޮނޑިތައް ހުންނަވާގޮތުން މަޖިލީހުގެ ބަލިވެއިންނެވި މެމްބަރަކަށް އުނދަގޫފުޅުވެ އެހެން ގޮތެއް އިންތިޒާމް ކޮށްދެއްވުމަށް އެދިވަޑައިގަނެފައިވާކަމަށް އިޝާރާތްކުރައްވާ މަޖިލީހުގެ ރައީސް މުޙައްމަދު ނަޝީދު ވިދާޅުވީ މަޖިލީހުގައި މިހާރު މައިންނަށް ޚާއްޞަ ކޮޓަރިއެއް ހުންނާނެކަމަށާއި، މަޖިލީހުގެ އިދާރާގައި މަސައްކަތްކުރާ މުވައްޒަފުންނަށް އެމީހުންގެ ތުއްޕުޅު ބޭފުޅުންވެސް ބެލެހެއްޓޭނެ އިންތިޒާމް އެތަނުގައި ހަމަޖައްސާފައިވާކަމަށެވެ. އަދި އެކުދިންނަށް އެކޮޓަރީގައި ކުޅެވޭނެ އިންތިޒާމުވެސް ހަމަޖައްސާފައިވާކަމަށެވެ.
މައިންގެ ކޮޓަރިއެއް މިހާރު މަޖިލީހުގައި ހުންނާނެ. މިއަދު އަޅުގަނޑުމެންނަށް އެ ކޮޓަރީގެ ބޭނުންކުރަން ފެށޭނެ. އެހެންވީމާ އެއްވެސް ބޭފުޅެއްގެ ކުޑަކުދިން ވަގުތުކޮޅަކަށް އެހެން ތަނަކަށް ފޮނުއްވެން ނެތްކަމަށްވާނަމަ މިހާރު އިރާދަކުރެއްވިއްޔާ މަޖިލީހުގައި އެކުދިން ބެލެހެއްޓޭނެ މައިންގެ ކޮޓަރީގައި. ރައީސް ނަޝީދު ވިދާޅުވިއެވެ.
މަޖިލީހުގެ ރައީސް ވިދާޅުވީ މަޖީލީހުގައި އެކުދިން ބެލެހެއްޓޭނެ އިންތިޒާމް ހަމަޖައްސާފައި ވީނަމަވެސް އެންމެ ރަނގަޅުގޮތަކީ އާއިލާއާއެކު އެކުދިންބޭތިއްބުން ކަަމަށެވެ. ނަމަވެސް އިތުރުގޮތެއް ނެތްނަމަ މަޖިލީހަށް ތުއްޕުޅު ބޭފުޅުން ގެންދަވަން އިރުޝާދު ދެއްވަމުން މަޖިލީހުގެ ރައީސް ވިދާޅުވީ އެކުދިން މަޖިލީހަށް ގެންނެވުމުން އެމަނިކުފާނަށް ވީވަރަކުން ބަލަހައްޓަވާނެކަމަށެވެ.
މައިންގެ ކޮޓަރި ހަދާފައިވަނީ ރައްޔިތުންގެ މަޖިލީހުގެ އިދާރާގެ އައު އިމާރާތުގެ ފުރަތަމަ ފަންގިފިލާގައެވެ. މިއީ ރައްޔިތުންގެ މަޖިލީހުގެ މެންބަރުންނާއި އިދާރީ މުވައްޒަފުން ބޭނުން ކުރުމަށް ހަދާފައިވާ ތަނެކެވެ. މަޖިލީހުގައި މެންބަރުގެ ގޮތުގައި 4 އަންހެން މެންބަރުން އެބަތިއްބެވެ.
ކޮމެންޓު ފޮނުވާ