ރާއްޖޭގެ މީހުން ދިރިއުލޭ ރަށްރަށުގެ މޫދުގައި ގެއަޅައިގެން ދިރިއުޅުމުގެ ކޮންސެޕްޓެއް މިހާރު ތައްޔާރުކޮށްފައި ވާކަމަށް މިނިސްޓަރ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.
ވިލުފުށީ ދާއިރާގެ މެންބަރު ޙަސަން އަފީފް ހުށައަޅުއްވާފައިވާ ބިނާވެށި ޕްލޭންކުރުމާއި ހިންގުމުގެ ބިލާއި ގުޅޭގޮތުން މިއަދުގެ ޖަލްސާގައި ވާހަކަފުޅު ދައްކަވަމުން ޕްލޭނިންގ މިނިސްޓަރ މުޙައްމަދު އަސްލަމް ވިދާޅުވީ، ރާއްޖޭގައި އޮތް ބިމަކީ އެންމެ ތަދު އެއްޗެއްގޮތުގައި މިހާރު ފާހަނގަކުރެވެން ފަށާފައިވާކަމަށެވެ.
ރާއްޖޭގެ ބިމާ ގުޅޭގޮތުން ދިވެހިން ދެކޭގޮތްވެސް މިހާރު ބަދަލުވާން ފަށާފައިވާކަމަށާއި، ރާއްޖޭގައި މިހާތަނަށް ބިންތައް ތަރައްޤީވެފައި އޮތީ މާބޮޑު ތަސައްވުރެއް އޮވެގެން ނޫންކަމަށެވެ. އެކަމުގެ ސަބަބުން ބައެއް ރަށްރަށުގައި މީހުން ތޮއްޖެހި އަދި ބިމުގެ ބޭނުން އެންމެ ހެޔޮގޮތުގައި ބޭނުން ނުކުރެވި އެބަހުރިކަމަށެވެ.
މިނިސްޓަރ އަސްލަމް ވިދާޅުވީ މޫދުގައި ކޮޓަރި އަޅައިގެން ދިރިއުޅޭ ވާހަކަ ދެއްކުމުން ގިނަބައެއްގެ ފާޑުކިއުން އަމާޒުވިކަމަށާއި ނަމަވެސް އެމަނިކުފާނު އެކަން ނަގަނީ ވަރަށް ރަނގަޅު ވިސްނުމެއްގެ ގޮތުގައިކަމަށެވެ. މިނިސްޓަރ ވިދާޅުވީ މޫދުގައި ކޮޓަރި އަޅައިގެން ދިރިއުޅޭނެ މޮޑެލެއް ރާއްޖޭގެ މީހުން ދިރިއުޅޭ ރަށެއްގައި މިހާރު ހަދާފައި ވާކަމަށެވެ. އެކޮންސެޕްޓް އަދި ފުރިހަމަވެފައި ނުވިނަމަވެސް އެއީ މިހާރު ހެދިފައިވާ މޮޑެލެއްކަމަށް މިނިސްޓަރ ވިދާޅުވި އެވެ.
"ދެން އަޅުގަނޑުމެން މީތި ކޮންޕެއާކުރަން މިޖެހެނީ ބިން ހިއްކާފައި އެލިބޭ ޑްރައި ލޭންޑްގެ ވެލިއުއާ އަޅުގަނޑުމެން މިދެންނެވި ގޮތަށް އޯވަ ވޯޓާގައި ލިވް ކުރަން އެދާއަގާއި އަކަފޫޓަކަށް ދާއަގާއި މިދޭތީގެ ހުރި އަގުގެ ތަފާތުން އަޅުގަނޑުމެން މިނާފައި ކޮންގޮތަކަށްތޯ؟ އަޅުގަނޑުމެން ދާންވީ އޭގެ މިކްސްޗާއެއް އޮންނަންވީ ކިހިނެއްތޯ؟"
މިނިސްޓަރ ވިދާޅުވީ މޫދުގައި ގެ އަޅައިގެން ދިރިއުޅުމަކީ ރާއްޖެފަދަ ބިމުގެ މައްސަލަ ކުރިމަތިވެފައިވާ ޤައުމަށް ކޮންމެވެސްވަރެއްގެ ހައްލަކަށް ވެގެންދާނެކަމަށެވެ.
ރާއްޖޭގެ ރަށްރަށުގެ ބިންހިއްކުމުގެ ބަދަލުގައި، ލޮނުގަނޑުމަތީގައި ގެދޮރު އަޅައި ދިރިއުޅޭ ބަޔަކަށް ވުމުގެ ވިސްނުން ގެންގުޅެން އެބަޖެހޭކަމުގައި މިނިސްޓަރ އަސްލަމް މިއަހަރުގެ ފެބުރުއަރީ މަހުވެސް މަޖިލީހުގައި ވިދާޅުވެފައިވެއެވެ.
ކޮމެންޓު ފޮނުވާ