ސައުދީގެ ވެރިރަށް ރިޔާޟުގެ ކިންގް ޚާލިދު އިންޓަނޭޝަނަލް އެއާޕޯޓަށް ޙޫޘީން ދިން ހަމަލާއެއްގައި ތިން މީހަކު މަރުވުމާ ގުޅިގެން، ޔަމަނުގައި ހުރި ޙޫޘީންގެ މަރުކަޒުތަކަށް ސައުދީ އިއްތިހާދުން ވަރުގަދަ ވައިގެ ހަމަލާތަކެއް ދީފިއެވެ.
ރިޔާޟް އެއާޕޯޓަށް ދިން ހަމަލާގައި ސައުދީ އެއާލައިންސްގެ މަތިންދާބޯޓަކަށް ވެސް ބޮޑެތި ގެއްލުންތަކެއް ލިބިފައިވެއެވެ. ޔަމަން ސަރުކާރުގެ ސިފައިންނާ ގުޅިގެން ސައުދީ އިއްތިހާދުން ޞަންޢާއާއި ތަޢިއްޒަށް ދިން ހަމަލާތަކުގައި، ރަތްކަނޑުގެ އައްސޭރިފަށުން މިސައިލް ފޮނުވުމަށް ޙޫޘީން ބޭނުންކުރާ ތިން ޕްލެޓްފޯމް ހަލާކުކޮށްލި ކަމަށް ޔަމަން ސަރުކާރުން ކަށަވަރުކޮށްދީފިއެވެ. މި އޮޕަރޭޝަން ހިންގީ ކަނޑުގެ ދަތުރުފަތުރާއި ސައުދީގެ މަދަނީ ވަސީލަތްތަކަށް ޙޫޘީން ދޭ ހަމަލާތައް ހުއްޓުވުމަށް ކަމަށް ސައުދީ އިއްތިހާދުން ބުނެއެވެ.
މީގެ ރައްދުގައި، ސައުދީގެ ތެޔޮ މަރުކަޒުތަކުގައި މަސައްކަތްކުރާ ބޭރުގެ އިންޖިނިއަރުން ވަގުތުން އެތަންތަން ދޫކޮށް ދިއުމަށް ޙޫޘީންގެ ތަރުޖަމާނު ޔަޙްޔާ ސަރީޢު އިންޒާރުދީފިއެވެ. ސައުދީގެ ވައިގެ ސަރަހައްދާއި އެއާޕޯޓްތަކަކީ އަސްކަރީ އަމާޒުތަކެއް ކަމަށް ވެސް ޙޫޘީން އިއުލާންކޮށްފައިވެއެވެ.
މި ހަމަނުޖެހުންތަކާ ގުޅިގެން ބައެއް ބައިނަލްއަޤްވާމީ އެއާލައިންތަކުން ރިޔާޟަށް ކުރާ ދަތުރުތައް ވަގުތީގޮތުން މެދުކަނޑާލާފައިވާއިރު، އެ ސަރަހައްދުގައި އިތުރަށް ސަމާލުވުމަށް ޔޫރަޕިއަން ޔޫނިއަންގެ ވައިގެ ރައްކާތެރިކަމާ ބެހޭ އިދާރާ (އީ.އޭ.އެސް.އޭ) އިން އެއާލައިންތަކަށް އިރުޝާދުދީފިއެވެ. ނަމަވެސް، ރިޔާޟް އެއާޕޯޓުގެ ޚިދުމަތްތައް އާންމު ހާލަތަށް ގެނައުމުގެ މަސައްކަތް ކުރިއަށްދާ ކަމަށް ސައުދީގެ މަދަނީ އުދުހުންތަކާ ބެހޭ އިދާރާއިން ބުނެއެވެ.
މި ހަމަލާތައް ހިނގީ ދުނިޔޭގެ ހަކަތައިގެ ވަޒީރުންނާއި ކުންފުނިތަކުގެ އިސްވެރިން ބައިވެރިވާ "ޑަބްލިއު.ޕީ.ސީ އެނާޖީ ކޮންގްރެސް" ރިޔާޟުގައި ފެށުމަށް ކައިރިވެފައި ވަނިކޮށެވެ. ރައްކާތެރިކަމުގެ ސަބަބުން، އިޓަލީގެ ހަކަތައިގެ ވަޒީރު ޖިލްބަރޓޯ ޕިޗެއްޓޯ ފްރާޓިން ވަނީ ވީޑިއޯ ކޮންފަރެންސް މެދުވެރިކޮށް ބައިވެރިވެވަޑައިގަތުމަށް ނިންމަވާފައެވެ.
ޔަމަނުގައި 2014 ވަނަ އަހަރު ފެށުނު ހަނގުރާމައިގެ ތެރެއިން، މިދިޔަ ޖުލައި މަހުން ފެށިގެން ސައުދީ އިއްތިހާދާއި ޙޫޘީންގެ ދެމެދު ހަމަލާތައް ވަނީ ވަރަށް ބޮޑަށް އިތުރުވެފައެވެ.
ކޮމެންޓު ފޮނުވާ