އުވާލި އަތޮޅު ކައުންސިލްތައް އަނބުރާ ގެނައުމަށް އެމްޑީޕީގެ ކޮންގްރެސްއިން ނިންމައިފި

އެމްޑީޕީގެ ލާމަރުކަޒީ ކޮމިޓީގެ ޗެއާޕާސަން އަލީ ނިޔާޒް ހުށަހެޅުއްވި ލާމަރުކަޒީ ސިޔާސަތު ކަރުދާސް، ޕާޓީގެ ކޮންގްރެސްއިން މިއަދު ފާސްކޮށްފި އެވެ.

ކައުންސިލްތަކުގެ ޖަމިއްޔާގެ ފަންނީ ލަފާގެ މަތިން ތައްޔާރުކުރި މި ކަރުދާހުގައި، ކައުންސިލްތަކަށް މިހާރު ކުރިމަތިވާ ގިނަ މައްސަލަތަކަށް އަލިއަޅުވާލާފައި ވެ އެވެ. ކަރުދާހުގެ މައިގަނޑު ހުށަހެޅުންތަކަކީ ކައުންސިލްތަކަށް ދޫކުރާ ފައިސާ އިތުރުކުރުމާއި، ޓެކްސްތަކުން ބައެއް ދިނުމާއި، ކައުންސިލްތަކުގެ އިޚްތިޞާޞް ގާނޫނުއަސާސީގައި ކަނޑައެޅުމެވެ.

އެގޮތުން މިހާރު ދޭ 5 ޕަސެންޓުގެ ބަދަލުގައި ދައުލަތުގެ އާމްދަނީގެ 15 ޕަސެންޓު ބްލޮކް ގްރާންޓުގެ ގޮތުގައި ދިނުމާއި، ގްރީން ޓެކްސްގެ 20 ޕަސެންޓާއި ބިމު ކުލީގެ ބައިކުޅަ އަދި މަރުކަޒީ ޓެކްސްތަކުގެ 5 ޕަސެންޓު ކައުންސިލްތަކަށް ދިނުން ހުށަހަޅާފައި ވެ އެވެ. އަތޮޅު ކައުންސިލްތައް އަލުން ގާއިމުކުރުމާއި، މުވައްޒަފުން އައްޔަންކުރުމުގެ ބާރު ކައުންސިލްތަކަށް ދިނުމާއި، ސަރަހައްދީ ކޮމިއުނިޓީ ބޭންކުތައް އުފެއްދުމާއި، ދިރިއުޅޭ ތަނަކަށް ވޯޓުދެވޭ ގޮތް ހެދުން ވެސް ހުށަހެޅުންތަކުގެ ތެރޭގައި ހިމެނެ އެވެ.

މިހާރުގެ ސަރުކާރުން ކައުންސިލްތަކުގެ ވިޔަފާރީގެ ފުރުސަތު ހަނިކޮށް، މުވައްޒަފުން ނެގުމުގެ ބާރު އަތުލައި، އަތޮޅު ކައުންސިލްތައް އުވާލާފައި ވެ އެވެ. އެ ބަދަލުތަކަށް ފަހު އޭޕްރީލްގައި ބޭއްވި ލޯކަލް ކައުންސިލް އިންތިހާބުގައި ކައުންސިލްތަކުގެ ގިނަ ގޮނޑިތަކާއި ފަސް ސިޓީގެ މޭޔަރުކަން ކާމިޔާބުކުރީ އެމްޑީޕީއިންނެވެ.