އައްޑޫ ސިޓީއާއި ފުވައްމުލައް ސިޓީގެ ފެނާއި ނަރުދަމާގެ ޚިދުމަތް، މާލެ ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ) އިން ރަސްމީކޮށް ހިންގަން ފަށައިފި އެވެ.
އެމްޑަބްލިއުއެސްސީގެ މެނޭޖިންގ ޑިރެކްޓަރ ޙުސައިން ފަހުމީ އެކްސްގައި ހާމަކުރެއްވި ގޮތުގައި، ހުޅުދޫއާއި މީދޫ ހިމެނޭ ގޮތަށް އައްޑޫ ސިޓީއާއި ފުވައްމުލަކުގެ ފެނާއި ނަރުދަމާގެ ޚިދުމަތާ ކުންފުނިން ހަވާލުވީ، 1 އޮކްޓޫބަރު ވީ ބުރާސްފަތި ދުވަހު އެވެ. މި ބަދަލު ގެނައީ ކޯޕަރޭޓް ދާއިރާ އިޞްލާޙުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ކަނޑައަޅާފައިވާ ސިޔާސަތުގެ ދަށުންނެވެ.
މި ބަދަލާ ގުޅިގެން އެމްޑަބްލިއުއެސްސީއާއި ފެނަކަ ކޯޕަރޭޝަނާ ދެމެދު ފްރޭމްވޯކް އެއްބަސްވުމެއްގައި ސޮއިކުރެވިފައިވާ އިރު، ދެ ސިޓީގެ ފެނާއި ނަރުދަމާއާ ގުޅޭ ހުރިހާ އިންފްރާސްޓްރަކްޗަރާއި ވަސީލަތްތައް އެމްޑަބްލިއުއެސްސީއާ ހަވާލުކުރުމުގެ މަސައްކަތް ނިމިފައިވާ ކަމަށް ފަހުމީ ވިދާޅުވި އެވެ.
ރައްޔިތުންނަށް މެދުނުކެނޑި، އިތުބާރުހުރި ޚިދުމަތެއް ދިނުމުގެ ގޮތުން ފަންނީ އެސެސްމަންޓްތަކެއް ހަދާފައިވާ ކަމަށާއި، އެއަށް ބިނާކޮށް ޚިދުމަތުގެ ފެންވަރު މަތިކޮށް ނިޒާމުތައް އަޕްގްރޭޑްކުރުމުގެ މަސައްކަތް މިހާރު ބާރަށް ކުރިއަށް ގެންދަމުންދާ ކަމަށް ވެސް ފަހުމީ ވިދާޅުވި އެވެ.
ކޮމެންޓު ފޮނުވާ