ކޯޓަށް ހުށަހަޅާ މައްސަލަތަކަށް ގޮތް ނިންމުމުގެ ޒިންމާ އޭއައި ފަދަ ޓެކްނޮލޮޖީއަކާ ހަވާލުކުރުމަކީ ކުރެވިދާނެ ކަމެއް ނޫން ކަމަށް އުއްތަމަ ފަނޑިޔާރު އަބްދުލްޣަނީ މުހައްމަދު ވިދާޅުވެއްޖެ އެވެ.
އެމަނިކުފާނު މި ޚިޔާލު ފާޅުކުރެއްވީ އުޒްބެކިސްތާނުގެ ސަމަރުގަންދުގައި ބާއްވަމުންދާ، އޭޝިއާގެ ދުސްތޫރީ ކޯޓުތަކާއި އެފަދަ މުއައްސަސާތަކުގެ ޖަމުއިއްޔާ (އޭއޭސީސީ)ގެ ހަތްވަނަ ކޮންގްރެސްގައި ކުރެއްވި ތަގުރީރެއްގަ އެވެ. ތަގުރީރުގެ މައުޟޫއަކީ އަވަސް އިންސާފު ހޯދައިދިނުމާއި ޝަރީއަތުގެ ނިޒާމަށް އިތުބާރު ބޮޑުކުރުމުގައި ޑިޖިޓަލް ޓެކްނޮލޮޖީއަށް ލިބިދޭ ދައުރެވެ.
ޣަނީ ވިދާޅުވީ ޓެކްނޮލޮޖީ ކިތަންމެ ކުރިއަރައިފި ނަމަވެސް، ފަނޑިޔާރަކު ޙުކުމެއް ނިންމުމުގައި އަދާކުރައްވާ ދައުރު އަލްގޯރިދަމްއަކަށް ބަދަލުކުރެވޭނެ ނޫން ކަމަށެވެ. އެހެންކަމުން ޖުޑީޝަރީތަކުން ބޯލަންވާނީ އޭއައި ބޭނުންކުރުމަކީ ފަނޑިޔާރުންގެ މަސައްކަތަށް އެހީތެރިވެދޭ ވަސީލަތެއްގެ ގޮތުގައި ބޭނުންކުރުމަށް ކަމަށް އެމަނިކުފާނު ވިދާޅުވި އެވެ.
ރާއްޖޭގެ ކޯޓުތަކުގައި ޖަމާވެފައިވާ މައްސަލަތައް ނިންމުމަށް ކުރިއަށްގެންދާ ހާއްސަ މަސައްކަތާއި، މައްސަލަތައް ލަސްވާ ސަބަބުތައް ދެނެގަތުމަށް ޓެކްނޮލޮޖީގެ ބޭނުން ހިފަމުންދާ ގޮތް ވެސް އުއްތަމަ ފަނޑިޔާރު ތަގުރީރުގައި ބަޔާންކުރެއްވި އެވެ. ރާއްޖޭގައި ހުރިހާ ކަމެއް ހިމެނޭ ކޭސް މެނޭޖްމަންޓް ސިސްޓަމެއް ގާއިމުކުރުމަކީ ލަނޑުދަނޑިއެއް ކަމަށް ވެސް ވިދާޅުވި އެވެ.
ކޮންގްރެސްގެ ތެރޭގައި އެހެން ގައުމުތަކުގެ އުއްތަމަ ފަނޑިޔާރުންނާއި ޖުޑީޝަރީގެ އިސްވެރިންނާ އެކު ބޭއްވި ބައްދަލުވުންތަކުގައި ވެސް ޣަނީ ބައިވެރިވެވަޑައިގެންނެވި އެވެ. ދުސްތޫރީ ކޯޓުތަކުގައި އޭއައި ބޭނުންކުރުމާ ބެހޭ މަބާދިއުތައް ކަނޑައަޅާ "ސަމަރުގަންދު ޑިކްލަރޭޝަން" ވެސް މި ކޮންގްރެސްގައި ފާސްކުރި އެވެ.
ކޮމެންޓު ފޮނުވާ