ޑިމޮކްރަސީ ވަރުގަދަ ވާނީ ރައްޔިތުން ފުދުންތެރިވެ، ގައުމުގެ އިގުތިސާދު ހަރުދަނާ ވުމުން ކަމަށް އެމްޑީޕީގެ ކުރީގެ ރައީސް އަދި ކުރީގެ ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެ އެވެ.
އެމްޑީޕީގެ 5 ވަނަ ކޮންގްރެސްގެ ތެރެއިން ބާއްވަމުންދާ އިންވެސްޓްމަންޓް ފޯރަމާ ގުޅުވައިގެން ލިޔުއްވި ޕޯސްޓެއްގައި ޝާހިދު ވިދާޅުވީ، ގައުމަކަށް އިންވެސްޓްމަންޓް ލިބެން ފަހި މާހައުލެއް އޮތުމާއި، އިންވެސްޓަރުންނަށް އެ ގައުމަކަށް އިތުބާރު ކުރެވުމަކީ ވަރަށް މުހިންމު ކަމެއް ކަމަށެވެ. އަދި މި ފޯރަމަކީ ކައުންސިލްތަކާއި އިންވެސްޓަރުން ބައްދަލުކޮށްދީ، އެ ދެފަރާތް ގުޅުވައިދޭ މުހިންމު ފަށްފުރެއް ކަމަށް ވެސް ޝާހިދު ވިދާޅުވި އެވެ.
މި ފޯރަމާ ބެހޭގޮތުން ވާހަކަ ދައްކަވަމުން އެމްޑީޕީގެ ޗެއަރޕާސަން، ކުރީގެ ރައީސް މުހައްމަދު ނަޝީދު ވިދާޅުވީ، ރަށްރަށުގެ ރައްޔިތުން މާލެ އަންނަން ޖެހޭ ސަބަބުތައް ރަށުގައި ހަމަ ކޮށްދީ، ރަށްރަށުގެ އިގުތިސާދު ކުރިއަރުވަން ބޭނުންވާ ކަމަށެވެ. ކައުންސިލްތަކުން މަޝްރޫއުތައް ރާވައި ތަންފީޒުކުރުމަކީ ވަރަށް ބޭނުންތެރި ކަމެއް ކަމަށް ވިދާޅުވި ނަޝީދު ވިދާޅުވީ، ޕާޓީގެ ޕްރޮޖެކްޓް އޮފީހުން ކައުންސިލްތަކާ ގުޅިގެން ކުރި މަސައްކަތުގެ ނަތީޖާއެއްގެ ގޮތުން، ކައުންސިލްތަކުން ވިޔަފާރީގެ 100 މަޝްރޫއު ހުށަހަޅާފައިވާ ކަމަށެވެ.
ކޮމެންޓު ފޮނުވާ