ހައްޖު ކޯޕަރޭޝަނުން ތަރައްޤީކުރާ ލަގްޒަރީ ހައުސިން އިމާރާތް 'ނިއާމް ރެސިޑެންސް’ގެ ޔުނިޓުތައް މުވައްޒަފުންނަށް ވިއްކުމަށް ވެފައިވާ ހުރިހާ މުޢާމަލާތެއް ބާތިލުކުރަން އެ ކުންފުނިން ނިންމައިފި އެވެ. މި ނިންމުން ނިންމީ، އެ އިމާރާތުގެ ޕެންޓުހައުސްތައް ކުންފުނީގެ ކުރީގެ ވެރިންނަށް ހެޔޮ އަގުގައި ލިބޭ ގޮތަށް އޮތްކަން 'ދައުރު’ން ހާމަކުރުމާއެކު، އާންމުންގެ ފަރާތުން ގިނައިން ފާޑުކިޔަން ފެށުމުންނެވެ.
ހުޅުމާލޭގެ ދެވަނަ ފިޔަވަހީގައި އަޅާ 15 ފަންގިފިލާގެ މި އިމާރާތުން ޔުނިޓު ގަތުމުގައި މުވައްޒަފުންނަށް އިސްކަމާއި ލުއި އަގު ލިބޭނެ އުސޫލެއް، ކުންފުނީގެ މެނޭޖްމަންޓަށް ބަދަލު އައުމުގެ ކުރިން މިއަހަރު ހަދާފައިވެ އެވެ. އެ އުސޫލުގެ ދަށުން ޕެންޓުހައުސް ރިޒާވްކުރި މީހުންގެ ތެރޭގައި، ކުރީގެ މެނޭޖިން ޑިރެކްޓަރު އަދި މިހާރު އިލެކްޝަންސް ކޮމިޝަންގެ ރައީސް މުޙައްމަދު ޝަކީލް، ކުރީގެ ސީއޯއޯ ނަޖީލް އަޙްމަދު އަދި މިހާރުގެ ޑެޕިއުޓީ މެނޭޖިން ޑިރެކްޓަރު މުޙައްމަދު ޝިހާބު ހިމެނެ އެވެ.
ހައްޖު ކޯޕަރޭޝަނުން ރޭ ނެރުނު ބަޔާނުގައި ބުނީ، ކުންފުންޏަށް އެންމެ ބޮޑު ފައިދާއެއް ލިބޭނެ ގޮތަށް ޔުނިޓުތަކުގެ އަގު ކަނޑައަޅައި، އެ ޔުނިޓުތައް އާންމުކޮށް ވިއްކަން ހުޅުވާލާނެ ކަމަށެވެ. ނިއާމް ރެސިޑެންސަކީ ކުންފުނީގެ މާލީ ހާލަތު ރަނގަޅުކުރުމުގެ މަސައްކަތުގެ ދަށުން ކުރިއަށްގެންދާ މަޝްރޫޢެކެވެ.
ކޮމެންޓު ފޮނުވާ