ދުބާއީން ތެލް އަވީވަށް ދަތުރުކުރަމުންދިޔަ ފްލައިދުބާއީގެ އެފް.ޒެޑް 1073 ފްލައިޓުގެ ކޯ-ޕައިލެޓް، ކެޕްޓަނަށް ވަޅިން ހަމަލާދީ ޒަޚަމްކުރުމަށްފަހު ބޯޓު ވައްޓާލަން އުޅުނު ކަމަށް އިޒްރޭލުގެ އޮފިޝަލުން ބުދަ ދުވަހު ބުނެފި އެވެ. ފަސިންޖަރުން ކޯ-ޕައިލެޓް ކޮންޓްރޯލްކުރުމާއެކު، ބޯޓުގައި ތިބި އެހެން ޕައިލެޓުން ބޯޓު ސަލާމަތުން ސައުދީ އަރަބިއްޔާއަށް ޖެއްސި އެވެ. ބޯޓުގައި 170 އަށްވުރެ ގިނަ އިޒްރޭލު ރައްޔިތުން ތިއްބެވެ.
ބޯޓުގައި ތިބި ފަސިންޖަރަކު ދިން މަޢުލޫމާތާ ހަވާލާދީ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވީ، ބޯޓު ކުއްލިއަކަށް ތިރިއަށް ދާން ފެށުމުން ފަސިންޖަރުންނާއި ކްރޫ މެމްބަރަކު ކޮކްޕިޓްގެ ދޮރު ވައްޓާލައިގެން ވަދެފައިވާ ކަމަށާއި، އެވަގުތު ކޯ-ޕައިލެޓް ބޯޓުގެ ސިސްޓަމްތަކަށް ގެއްލުން ދެމުން ދިޔަ ކަމަށެވެ. ފްލައިޓްރޭޑާ24 ގެ މަޢުލޫމާތުން ދައްކާ ގޮތުގައި، އިމަޖެންސީ ސިގްނަލް ފޮނުވުމުގެ ކުރިން 30 ސިކުންތު ހަމަނުވާ ވަގުތުކޮޅެއްގައި ބޯޓު 14،000 ފޫޓަށްވުރެ ގިނައިން ތިރިވިއެވެ.
ނަތަންޔާހޫ ވިދާޅުވީ ޢުމާނުގެ ރައްޔިތެއް ކަމަށްވާ ކޯ-ޕައިލެޓް ހައްޔަރުކޮށް، ސައުދީގެ ފަރާތްތަކުން ސުވާލުކުރާނެ ކަމަށާއި ހުރިހާ ފަސިންޖަރުންގެ ހާލު ރަނގަޅު ކަމަށެވެ. އިޒްރޭލަށް ދަތުރުކުރާ ފްލައިޓުތަކުގެ ސަލާމަތީ ފިޔަވަޅުތައް ވަރުގަދަކުރުމަށްވެސް އެކަލޭގެފާނު އަންގަވާފައިވެ އެވެ. ސައުދީގައި އަށް ގަޑިއިރު ހޭދަކުރުމަށްފަހު، ފަސިންޖަރުން އިޒްރޭލަށް ދިޔައީ ފްލައިދުބާއީން ފޮނުވި އެހެން ބޯޓެއްގަ އެވެ.
ހާދިސާ ހިނގި ސަބަބު އަދި ނޭނގޭ ކަމަށް ބުނެ، ދުރާލާ ނަތީޖާއަކަށް ނުދިއުމަށް ފްލައިދުބާއީން އެދިފައިވެ އެވެ. އިޒްރޭލުގެ ޓްރާންސްޕޯޓް މިނިސްޓްރީން ބުނީ ދިފާޢީ އިދާރާތަކާ ގުޅިގެން މި މައްސަލަ ތަޙުޤީޤު ކުރަމުންދާ ކަމަށެވެ.
ކޮމެންޓު ފޮނުވާ