ފްލައިދުބާއީގެ މަތިންދާބޯޓެއްގެ ކޮކްޕިޓުގައި ދެ ޕައިލެޓުން ތަޅާފޮޅައިގަތުމާ ގުޅިގެން، އިސްރާއީލަށް ކުރާ ހުރިހާ ދަތުރުތަކެއް އެ އެއާލައިނުން ވަގުތީގޮތުން ހުއްޓާލައިފިއެވެ.
ހާދިސާ ހިނގީ ސެޕްޓެމްބަރު 30 ވަނަ ދުވަހު، 174 ފަސިންޖަރުން ތިބި ހާލު ދުބާއީން ތެލް އަވީވަށް ދަތުރުކުރި FZ1073 ފްލައިޓުގައެވެ. ކޮކްޕިޓުގައި ހަމަނުޖެހުން ހިނގުމުން ބޯޓު ވަނީ ސަޢޫދީ ޢަރަބިއްޔާގެ ތަބޫކުގައިވާ ޕްރިންސް ސުލްޠާން ބިން ޢަބްދުލްޢަޒީޒް އެއާޕޯޓަށް ކުއްލިގޮތެއްގައި ޖައްސާފައެވެ. ކެޕްޓަނާއި ފަސްޓް އޮފިސަރު ޒަޚަމްވެގެން ހޮސްޕިޓަލުގައި ފަރުވާ ދިން ނަމަވެސް، ފަސިންޖަރުންނާއި އެހެން ކްރޫއިން ސަލާމަތުން ތިބިކަމަށް ބުނެއެވެ. ތަބޫކުގައި ހުއްޓެން ޖެހުނު ފަސިންޖަރުން ފަހުން ފުރުވާލީ ފްލައިދުބާއީން ހަމަޖެއްސި އެހެން ބޯޓެއްގައެވެ.
ފްލައިދުބާއީން ބުނީ ތަޙުޤީޤު ކުރިއަށްދާ މުއްދަތުގައި އިސްރާއީލަށް ދާ އަދި އެ ޤައުމުން އަންނަ ދަތުރުތައް ހުއްޓާލާފައިވާއިރު، އިތުރު މަޢުލޫމާތު ލިބުމުން މި ނިންމުމަށް އަލުން ބަލާނެ ކަމަށެވެ. ދަތުރުތަކަށް އުނިކަން އެރުމުން ފަސިންޖަރުންގެ ކިބައިން މާފަށް އެދުނު އެއާލައިނުން، އެމީހުންނަށް ބަދަލު އިންތިޒާމުތައް ހަމަޖައްސައިދޭނެ ކަމަށްވެސް ބުންޏެވެ.
މި ހާދިސާގެ ތަޙުޤީޤު ސަޢޫދީ ޢަރަބިއްޔާގެ ނޭޝަނަލް ޓްރާންސްޕޯޓް ސޭފްޓީ ސެންޓަރުން ވަނީ ފަށާފައެވެ.
ކޮމެންޓު ފޮނުވާ