ރާއްޖެއަށް މިއަހަރު ޒިޔާރަތްކުރި ފަތުރުވެރިންގެ އަދަދު، މިދިޔަ އަހަރާ އަޅާބަލާއިރު 56,014 މީހުން މަދުވެފައިވާކަން ޓޫރިޒަމް މިނިސްޓްރީން ނެރުނު އެންމެ ފަހުގެ ތަފާސްހިސާބުތަކުން ދައްކައިފިއެވެ.
ސެޕްޓެމްބަރު 29 ވަނަ ދުވަހާ ހަމައަށް ރާއްޖެއަށް ޖުމްލަ 1,595,923 ފަތުރުވެރިން އައިސްފައިވާއިރު، މިއީ 2025 ވަނަ އަހަރާ އަޅާބަލާއިރު 3.4 އިންސައްތައިގެ ދަށްވުމެކެވެ. މިއަހަރު ދުވާލަކަށް އެވްރެޖްކޮށް 5,867 ފަތުރުވެރިން ރާއްޖެ އަންނައިރު، ކްރޫޒް ޕެސެންޖަރުންގެ ގޮތުގައި 15,583 މީހުން އައިސްފައިވެއެވެ.
އެންމެ ގިނަ ފަތުރުވެރިން އައިސްފައިވަނީ ޗައިނާއިން ކަމަށްވާއިރު، އެ ގައުމުން 298,891 ފަތުރުވެރިން (19.1%) އައިސްފައިވެއެވެ. ދެވަނައަށް 228,681 ފަތުރުވެރިންނާއެކު (14.6%) ރަޝިޔާ އޮތްއިރު، ތިންވަނައަށް 119,687 ފަތުރުވެރިންނާއެކު (7.6%) އިނގިރޭސިވިލާތް އޮތެވެ.
ރާއްޖޭގައި މިހާރު ހިންގަމުންދާ 67,869 އެނދުގެ ތެރެއިން 66 އިންސައްތަ ރިސޯޓުތަކުގައި ހުރިއިރު، 25 އިންސައްތަ ހުރީ ގެސްޓްހައުސްތަކުގައެވެ. ރާއްޖެ އައި ފަތުރުވެރިންގެ 73.7 އިންސައްތަ ޗުއްޓީ ހޭދަކޮށްފައިވަނީ ރިސޯޓުތަކުގައި ކަމަށްވާއިރު، 22 އިންސައްތަ ހޭދަކޮށްފައިވަނީ ގެސްޓްހައުސްތަކުގައެވެ.
މިދިޔަ އަހަރު ރާއްޖެއަށް 2 މިލިއަން ފަތުރުވެރިން އައިސްފައިވާއިރު، މިއަހަރު 2.2 މިލިއަން ފަތުރުވެރިން އަންނާނެކަމަށް ސަރުކާރުން ލަފާކޮށްފައިވެއެވެ.
ކޮމެންޓު ފޮނުވާ