ވެލާނާ އިންޓަނޭޝަނަލް އެއާޕޯޓުގައި މޯލްޑިވިއަން އިން ހިންގާ ސީޕްލޭން ޓާމިނަލްގައި ތަރައްގީގެ މަސައްކަތްތައް ނިންމައި، ޓޫރިޒަމް މިނިސްޓަރު މުހައްމަދު އަމީން ރަސްމީކޮށް ހުޅުއްވައިދެއްވައިފިއެވެ.
ޓާމިނަލްގައި ގެނެވުނު ބަދަލުތަކުގެ ތެރޭގައި ހުވަނދުމާ ލައުންޖް ފުޅާކުރުމާއި، ދަތުރުވެރިން މަޑުކުރާ ބޭރުގެ ސަރަހައްދު ބޮޑުކުރުން ހިމެނެއެވެ. އަދި ޓާމިނަލަށް ވަނުމަށް އާ ދޮރެއް ހުޅުވައި، ކުދިންނާއެކު ދަތުރުކުރާ އާއިލާތަކަށްޓަކައި ކުޑަކުދިން ކުޅޭނެ ތަނެއް ވެސް ތައްޔާރުކޮށްފައިވެއެވެ.
ޓޫރިޒަމް މިނިސްޓްރީން ބުނީ ހިދުމަތްތައް އަވަސްކުރުމުގެ ގޮތުން އިތުރު ވީއައިޕީ ބޯޑިން ގޭޓެއް ވެސް ގާއިމުކުރި ކަމަށެވެ.
ދުނިޔޭގެ އެންމެ ބޮޑު ސީޕްލޭން އޮޕަރޭޝަން ހިންގާ ގައުމުގެ ގޮތުން، ރިސޯޓުތަކަށް ދާ ފަތުރުވެރިންނަށް އަރާމު ހިދުމަތެއް ދިނުމަކީ ސިވިލް އޭވިއޭޝަން ދާއިރާ ހަރުދަނާކުރުމަށް ސަރުކާރުން ކުރާ މަސައްކަތުގެ މުހިންމު ބައެކެވެ. މި ބަދަލުތަކާއެކު ޓާމިނަލްގައި ދަތުރުވެރިން ހޭދަކުރާ ވަގުތު އިތުރަށް ރަނގަޅުވެ، ލުއިތަކެއް ލިބިގެންދާނެ ކަމަށް މޯލްޑިވިއަން އިން ބުނެއެވެ.
ކޮމެންޓު ފޮނުވާ