ރަސްމާލޭގައި ހިންގަން ރާވާފައިވާ ބޮޑު މަޝްރޫއު ކުރިއަށް ގެންދާނީ ގާނޫނުއަސާސީއާއި ގާނޫނުތަކާ އެއްގޮތަށް ކަމަށާއި، މި މަޝްރޫއު ހިންގާނީ މިހާރު ތައްޔާރުކުރަމުން ދާ ރިއަލް އެސްޓޭޓް ގާނޫނުގެ ދަށުން ކަމަށް ބަންޑާރަނައިބު އަހުމަދު އުޝާމް ވިދާޅުވެއްޖެ އެވެ.
އަބޫދާބީގެ އީގަލް ހިލްސް ކުންފުންޏާ އެކު 20 ބިލިއަން ޑޮލަރުގެ އެއްބަސްވުމުގައި ސޮއިކުރުމާ ގުޅިގެން، އެއީ ގައުމު ވިއްކާލުން ކަމަށް ކުރީގެ ރައީސް އަބްދުﷲ ޔާމީނާއި އިދިކޮޅު ފަރާތްތަކުން ފާޑުކިޔުމުން، ސޯޝަލް މީޑިއާގައި ކުރެއްވި ޕޯސްޓެއްގައި އުޝާމް ފާހަގަކުރެއްވީ ރިޒޯޓު ކުއްޔަށް ދޭ މުއްދަތު 99 އަހަރަށް އިތުރުކުރީ ޔާމީންގެ ވެރިކަމުގައި ކަމެވެ. 1999 ގައި ފުރަތަމަ ޓޫރިޒަމް ގާނޫނު ހެދިއިރު އެ މުއްދަތަކީ ގިނަވެގެން 25 އަހަރު ކަމަށާއި، 2010 ގައި ރައީސް ނަޝީދުގެ ވެރިކަމުގައި 50 އަހަރަށް، އަދި 2015 ގައި 99 އަހަރަށް އިތުރުކުރި ކަމަށް އޭނާ ވިދާޅުވި އެވެ.
ޓޫރިޒަމް ގާނޫނުގެ 8 ވަނަ މާއްދާގެ ދަށުން 99 އަހަރު ހަމަވުމުން، އިންވެސްޓްމަންޓްގެ އަގުން ބޮލަކަށް ކެނޑުމަށްފަހު ބާކީވާ ފައިސާ ސަރުކާރުން އިންވެސްޓަރަށް ދައްކަން ޖެހޭނެ ކަމަށް އޭޖީ ފާހަގަކުރެއްވި އެވެ. ނަމަވެސް ރަސްމާލެ މަޝްރޫއު ބަލަހައްޓާނީ އެ ގާނޫނުގެ ދަށުން ނޫން ކަމަށް އޭނާ ވިދާޅުވި އެވެ.
މިހާތަނަށް ސޮއިކޮށްފައިވަނީ ހަމައެކަނި ލެޓާ އޮފް އިންޓެންޓެއްގައި ކަމަށާއި، މަޝްރޫއުގެ މަސައްކަތް ފެށުމުގެ ކުރިން ޑެފިނިޓިވް އެގްރީމެންޓްތަކުގައި ސޮއިކޮށް، ގުޅުންހުރި ގާނޫނުތައް މަޖިލީހުން ފާސްކުރަން ޖެހޭނެ ކަމަށް ވެސް އުޝާމް ވިދާޅުވި އެވެ.
މި އެއްބަސްވުމަކީ ގާނޫނުއަސާސީގެ 250 ވަނަ މާއްދާއާ ހިލާފު އެއްބަސްވުމެއް ކަމަށް ބުނެ، އެ ބާތިލުކުރުމަށް ދުސްތޫރީ މައްސަލައެއް ވެސް ސުޕްރީމް ކޯޓަށް ވަނީ ހުށަހަޅާފަ އެވެ.
ކޮމެންޓު ފޮނުވާ