ވ. އާރަށް ކުއްޔަށް ދިނުމާ ގުޅޭ މައްސަލާގައި ކުރީގެ ރައީސް އަބްދުﷲ ޔާމީން ހުށަހަޅުއްވާފައިވާ ތިން ދިފާޢީ ހެއްކަކަށް ފުރުސަތު ނުދިނުމަށް ދައުލަތުން ކޯޓަށް އެދިއްޖެއެވެ.
އެތައް ދުވަހަކަށްފަހު މިއަދު ބޭއްވި އަޑުއެހުމުގައި ދައުލަތުން ބަލައިނުގަތުމަށް އެދުނީ ޔޫތު މިނިސްޓްރީގެ ޑެޕިއުޓީ މިނިސްޓަރު، މާލޭގެ ކުރީގެ ޑެޕިއުޓީ މޭޔަރު އަޙްމަދު ނަރީޝް، ވިލިމާލެ ދާއިރާގެ މެމްބަރު މުޙައްމަދު އިސްމާޢީލް އަދި ހުޅުދޫ ދާއިރާގެ މެމްބަރު މުޙައްމަދު ޝާހިދުގެ ހެކިބަހެވެ. އޭގެ އިތުރުން، އަބްދުﷲ ރަޝީދު ކިޔާ މީހެއްގެ ހެކިބަހާއި، ޑޮލަރު ބަދަލުކުރިކަން ދައްކާ ލިޔުމެއްކަމަށް ބުނެ ހުށަހެޅި ލިޔުމެއްވެސް ނުގަބޫލުކުރުމަށް ދައުލަތުން އެދިފައިވެއެވެ.
ދައުލަތުން ބުނީ، ތަޙުޤީޤު މަރުޙަލާގައި ޔާމީން ހަނު ހުންނެވިއިރު ހާމަނުކުރައްވާ ހެކިތަކަށް މިހާރު ޝަރީޢަތުގައި ފުރުސަތު ދެވޭކަށް ނެތް ކަމަށެވެ.
މި މައްސަލަ ކުރިން ކްރިމިނަލް ކޯޓުގައި ބެލިއިރު، ޔާމީންގެ އެކައުންޓަށް ވަދެފައިވާ އެއް މިލިއަން ޑޮލަރަކީ ފެލިދޫ ދާއިރާގެ ކުރީގެ މެމްބަރު ޔޫސުފް ނަޢީމްގެ ކިބައިން ގަނެފައިވާ ފައިސާކަމަށާއި، އޭގެ ބަދަލުގައި ދިން ރުފިޔާ ގުނީ އަމިއްލައަށްކަމަށް ނަރީޝް ހެކިބަސް ދީފައިވެއެވެ. ނަމަވެސް އޭރުވެސް އޭނާގެ ހެކިބަހާ މެދު ސުވާލުތައް އުފެދިފައިވިއެވެ.
މި މައްސަލާގައި ޔާމީންގެ މައްޗަށް ދައުވާކުރަނީ ރިޝްވަތުގެ ގޮތުގައި އެއް މިލިއަން ޑޮލަރު ބަލައިގަނެ، އެ ފައިސާ ލޯންޑަރކުރި ތުހުމަތުގައެވެ. މެމްބަރު ޔޫސުފް ނަޢީމްގެ މައްޗަށްވެސް ދައުވާ ކުރެއެވެ. ކުރިން ކްރިމިނަލް ކޯޓުން ޔާމީނަށް 11 އަހަރުގެ ޖަލު ޙުކުމެއް ކުރި ނަމަވެސް، ހައިކޯޓުން އެ ޙުކުމް ބާޠިލުކޮށްފައިވެއެވެ.
ކޮމެންޓު ފޮނުވާ