އީރާނުގެ ވައިގެ ދަތުރުފަތުރާ ދެކޮޅަށް އެމެރިކާއިން އެޅި އާ ފިޔަވަޅުތަކާ ގުޅިގެން، އިރާޤުގެ ބަޣްދާދު، ނަޖަފް، އަރްބީލް އަދި ސުލައިމާނިއްޔާ އެއާޕޯޓުތަކުން އީރާނަށް ކުރަމުން އައި ފްލައިޓްތައް ހުއްޓާލައިފިއެވެ.
މި ނިންމުމަކީ އީރާނުގެ އެއާލައިންތަކާ މުޢާމަލާތްކުރާ ކުންފުނިތަކާ ދެކޮޅަށް ފިޔަވަޅު އަޅާނެކަމަށް އެމެރިކާއިން އިޢުލާނުކުރުމުން، އޯގަސްޓް މަހު ފެށި "އޮޕަރޭޝަން އިކޮނޮމިކް އައުޓްކާސްޓް"ގެ ދަށުން ނިންމި ނިންމުމެކެވެ. ފެބްރުއަރީ މަހު ހަނގުރާމަ ފެށުމަށްފަހު އީރާނުގެ އެއާލައިންތަކަށް އިރާޤަކީ މުހިންމު މަންޒިލަކަށް ވެފައި އޮތުމުން، މިހާރު ދެ ޤައުމުގެ މެދުގައި ދަތުރުކުރާ މީހުންނަށް 12 ގަޑިއިރަށްވުރެ ދިގު އެއްގަމު ދަތުރެއް ކުރަން ޖެހިއްޖެއެވެ.
ނަޖަފް އެއާޕޯޓުގެ ޑައިރެކްޓަރު ވިދާޅުވީ ބޮޑުވަޒީރުގެ އޮފީހުގެ އެންގުމަކާ ގުޅިގެން އީރާނަށް ކުރާ ހުރިހާ ދަތުރެއް ހުއްޓާލި ކަމަށެވެ. ޒިޔާރަތްތަކަށް ދާ މީހުން ގިނައިން ބޭނުންކުރާ މި އެއާޕޯޓަށް ކުރިން ދުވާލަކު 20 އަށްވުރެ ގިނަ ފްލައިޓް އީރާނުން ދަތުރުކުރި ނަމަވެސް، ހުކުރު ދުވަހު ހުރީ އެހެން ތަންތަނަށް ދާ ހަތަރު ފްލައިޓް ކަމަށް ބުނެއެވެ. ނަޖަފްގައި ހުންނަ އީރާނުގެ ކޮންސިއުލޭޓުން މި ނިންމުމާ މެދު ކަންބޮޑުވުން ފާޅުކޮށްފައިވެއެވެ.
ޔޫއޭއީ އާއި ޤަޠަރުންވެސް އީރާނަށް ކުރާ ފްލައިޓްތައް ކެންސަލްކޮށް ނުވަތަ މަދުކޮށްފައިވާއިރު، އީރާނުގެ އެއާލައިންތަކަށް މިހާރު ބާކީ އޮތީ ތުރުކީ، ރަޝިޔާ، ޗައިނާ އަދި އަރްމީނިއާ ފަދަ މަދު މަގުތަކެކެވެ. އީރާނަށް ތާއީދުކުރާ ޕާލަމެންޓް ފެކްޝަންތަކުގެ ނުރުހުމުގެ ބިރުން އިރާޤު ސަރުކާރުން މި ނިންމުން ރަސްމީކޮށް އިޢުލާނުކޮށްފައި ނުވާކަމަށް ރިޕޯޓުތަކުގައި ބުނެއެވެ.
ކޮމެންޓު ފޮނުވާ