އދ. ގެ އާންމު މަޖިލީހުގެ 81 ވަނަ ސެޝަނުގައި ވާހަކަ ދެއްކުމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ނިއުޔޯކަށް ދިޔުމާ ގުޅިގެން، އެ ސިޓީގެ ސަތޭކަ ގިނަ ބަޔަކު މަގުމަތިވެ އޭނާގެ ޒިޔާރަތާ ދެކޮޅަށް އަޑު އުފުލައިފިއެވެ.
ޣައްޒާގައި އިސްރާއީލުން ކުރިއަށްގެންދާ އަސްކަރީ ހަމަލާތަކަށް ނުރުހުން ފާޅުކުރި ބައިވެރިން، މެންހެޓަންގެ ފަސްޓް އެވެނިއު އާއި އދ. ގެ ހެޑްކުއާޓަރސް ވަށައިގެން މަގުތަކުގައި އިށީނދެ މަގުތައް ބަންދުކުރުމުން، އދ. އަށް ދިޔަ ރަސްމީ މޮޓޯކޭޑްތަކަށް އެހެން މަގުތަކުން ދަތުރުކުރަން ޖެހުނެވެ.
ނިއުޔޯކް ފުލުހުން ދިހައަކަށްވުރެ ގިނަ ބަޔަކު ހައްޔަރުކުރިއިރު، އޭގެ ތެރޭގައި އެކްޓަރުން ކަމަށްވާ ސޫޒަން ސަރަންޑަން، ހެނާ އައިންބައިންޑާ އަދި ސިންތިއާ ނިކްސަންގެ އިތުރުން ޗެލްސީ މެނިންގް، ސިޓީ ކައުންސިލް މެމްބަރު ޗީ އޮސޭ އާއި ބައެއް ސިޔާސީ ކެންޑިޑޭޓުން ހިމެނެއެވެ. އެމީހުންގެ މައްޗަށް އާންމު ނިޒާމު ނަގާލުމުގެ ތުހުމަތު ކުރަން ފުލުހުން ނިންމާފައިވެއެވެ.
ޖޫއިޝް ވޮއިސް ފޯ ޕީސް އާއި ޕެލެސްޓީނިއަން ޔޫތު މޫވްމަންޓުން އިންތިޒާމުކުރި މި ހަރަކާތުގައި ބައިވެރިން ތިބީ ހަތިޔާރަށް ނޫން، އިންސާނުންނަށް ފައިސާ ޚަރަދުކުރަން ގޮވާލާ ޓީޝާޓު ލައިގެންނެވެ. އެމެރިކާއިން އިސްރާއީލަށް ދޭ އަސްކަރީ އެހީ ހުއްޓާލުމަށް ގޮވާލާ ބޯޑުތައްވެސް އެމީހުން އުފުލިއެވެ. އަނެއްކޮޅުން، އިސްރާއީލަށް ތާއީދުކުރާ ބައެއް ޔަހޫދީ ގްރޫޕްތަކުންވެސް އދ. ގެ ބޭރުގައި އެއްވެ، އިތުރުވަމުންދާ އެންޓި-ސެމިޓިޒަމްއާ މެދު ކަންބޮޑުވުން ފާޅުކުރިއެވެ.
އދ. ގެ މާލަމުގައި ވާހަކަ ދައްކަން ނަތަންޔާހޫ ޕޯޑިއަމަށް ދިޔުމުން، ގިނަ ގައުމުތަކުގެ ޑެލިގޭޝަންތައް މާލަން ދޫކޮށް ނުކުމެގެން ދިޔައެވެ. އޭނާގެ ތަގުރީރުގައި އިސްރާއީލުގެ އަމަލުތައް ދިފާއުކޮށް، ފާޑުކިއުންތަކަށް ރައްދު ދިނެވެ. އާދަޔާ ޚިލާފަށް ކުރު މި ޒިޔާރަތުގައި، މަދު ބައްދަލުވުންތަކެއް ބޭއްވުމަށްފަހު އެދުވަހުމެ ނަތަންޔާހޫ އިސްރާއީލަށް އެނބުރި ދިޔައެވެ.
ކޮމެންޓު ފޮނުވާ