ދިވެހި މަސްވެރިންގެ އަތުން ސަރުކާރުން ގަންނަ ކަޅުބިލަމަހުގެ އަގު ކިލޯއަކަށް 22 ރުފިޔާއަށް އުފުލައި، ރާއްޖޭގެ ފަރުމަހުގެ ސިނާޢަތު ހަރުދަނާކުރުމުގައި މުހިއްމު ފިޔަވަޅެއް އަޅައިފިއެވެ. މި ބަދަލު އައިސްފައި ވަނީ ދާދިފަހުން ބާނާ މަހުގެ މިންވަރު ދަށްވެ، ބައިނަލްއަޤްވާމީ ބާޒާރުގައި ހިނގަމުންދާ ހަރަކާތްތަކާ ގުޅިގެންނެވެ.
މިދިޔަ ޖޫން މަހު ކިލޯއަކަށް 20 ރުފިޔާގައި ހުރި މަހުގެ އަގު، އޮގަސްޓު މަހު 21 ރުފިޔާއަށް އުފުލި، މިހާރު 22 ރުފިޔާއަށް ވަނީ އަރައިފައެވެ. މި މުއްދަތުގައި ދުވަހުން ދުވަހަށް ބާނާ މަހުގެ މިންވަރު ދަށްވުމުގެ ސަބަބުން، މަސްވެރިންނަށް އެހީތެރިވެދިނުމުގެ ގޮތުންނާއި، ސަޕްލައި ދެމެހެއްޓުމަށްޓަކައި މި އަގު ބޮޑުކުރަން ޖެހުނު ކަމަށް ކަމާ ބެހޭ ފަރާތްތަކުން ހާމަކުރެއެވެ. ސަރުކާރުގެ އައު ސިޔާސަތުގެ ދަށުން، ދުނިޔޭގެ ބާޒާރުގެ އަގުތަކާ ގުޅުވައިގެން ދިވެހި މަހުގެ އަގު ކަނޑައެޅުމުގެ އިތުރުން، މަސްވެރިންގެ ދިރިއުޅުމުގެ ފެންވަރު ހިފެހެއްޓުމަށްޓަކައި ކިލޯއަކަށް 20 ރުފިޔާގެ އެންމެ ދަށް އަގެއް ވެސް ކަނޑައަޅާފައި ވެއެވެ.
މީގެ ކުރިން 2023 ވަނަ އަހަރުގެ ފަހުކޮޅު އިންތިޚާބާ ދިމާކޮށް، ދިރާސާއެއް ނުކޮށް ކަޅުބިލަމަހުގެ އަގު ކިލޯއަކަށް 25 ރުފިޔާއަށް ބޮޑުކުރި ނިންމުމުގެ ސަބަބުން، މަސްވެރިންނަށް ދޭން ޖެހޭ 250 މިލިއަން ރުފިޔާ ނުދެވި ސިނާޢަތު ވަނީ ހުއްޓުމަކަށް އައިސްފައެވެ. ނަމަވެސް ސަރުކާރުން ވަނީ އެ ދަރަނިތައް އެއްކޮށް ޚަލާސްކޮށް، މަސްވެރިން މަސް ކިރާތާ 48 ގަޑިއިރުގެ ތެރޭގައި ފައިސާ ދޫކުރެވޭ ނިޒާމެއް ޤާއިމުކޮށްފައެވެ.
ސީޒަނާ ގުޅިގެން މަސްވެރިކަމަށް އަންނަ ލޮޅުންތަކުން ޤައުމީ އިޤްތިޞާދު ސަލާމަތްކުރުމަށްޓަކައި، ސަރަޙައްދީ ފިނިކުރާ ގުދަންތަކުގެ ޖާގަ ބޮޑުކުރުމާއި، މަސް ޕްރޮސެސްކުރުމުގެ ޤާބިލުކަން އިތުރުކުރުމަށް ޚާއްޞަ އިސްކަމެއް ދިނުމަށް ސަރުކާރުން ވަނީ ނިންމައިފައެވެ. މީގެ ސަބަބުން ބާނާ މަހުގެ މިންވަރު ދަށްވާ ދުވަސްވަރު ވެސް ބޭރު ފައިސާ ޤައުމަށް ވަދެ، ސިނާޢަތު ދެމެހެއްޓެނިވި ގޮތެއްގައި ކުރިއަރައިގެންދާނެ ކަމަށް ބެލެވެއެވެ.
ކޮމެންޓު ފޮނުވާ