ނޯވޭގެ ރައްޔިތުންގެ ބޮޑު ލޯތްބެއް ހޯއްދެވި ރަސްގެފާނު ހަރަލްޑް ފަސްވަނަ، އުމުރުފުޅުން 89 އަހަރުގައި އަވަހާރަވެއްޖެ އެވެ. އޮސްލޯގައި ހުންނަ ޝާހީ ގަނޑުވަރުން ހާމަކުރި ގޮތުގައި، ލޭގެ ނާދިރު ބައްޔެއް ކަމަށްވާ "ހީމޮލިޓިކް އެނީމިއާ" އަށް ފަރުވާ ހޯއްދަވަމުން ގެންދަވަނިކޮށް، ހުކުރު ދުވަހުގެ ހެނދުނު ނޯވޭ ގަޑިން 06:35 ހާއިރު އޮސްލޯގެ ނޭޝަނަލް ހޮސްޕިޓަލުގައި އެމަނިކުފާނު އަވަހާރަވި ކަމަށެވެ. އެމަނިކުފާނު އަވަހާރަވުމާ ގުޅިގެން ގަނޑުވަރުގެ ޝާހީ ދިދަ ވަނީ ބައިދަނޑިއަށް ތިރިކޮށްފަ އެވެ.
35 އަހަރު ދުވަހުގެ ދިގު ރަސްކަމަކަށްފަހު، ހަރަލްޑް ފާހަގަކުރެވެނީ ނޯވޭގެ ޝާހީ ނިޒާމު ޒަމާނީކުރައްވައި، އާންމު ރައްޔިތުންނާ ގާތް ގުޅުމެއް ބޭއްވި ބޭފުޅެއްގެ ގޮތުގަ އެވެ. އެމަނިކުފާނަކީ 14 ވަނަ ގަރުނަށްފަހު ނޯވޭގައި އުފަންވެވަޑައިގަތް އެ ގައުމުގެ ފުރަތަމަ ރަސްގެފާނެވެ. ޝާހީ އާއިލާއިން ބޭރުގެ އާންމު މީހަކާ ކަމަށްވާ ސޯންޔާ ހަރަލްޑްސަންއާ ކައިވެނި ބައްލަވައިގަތުމަށް ބައްޕާފުޅު ރަސްގެފާނު އޮލާވްގެ ހުއްދަ ލިބުމަށް ނުވަ އަހަރު މަޑުކުރައްވަން ޖެހިވަޑައިގަތެވެ. އެ ނިންމެވުމުގެ ސަބަބުން ދަރިކަލުންނަށް ވެސް އާންމުންނާ ކައިވެނިކުރެއްވުމުގެ މަގު ފަހިވެ، ޝާހީ އާއިލާގައި ފިރިހެނުންގެ ބާރުވެރިކަން ނިމުމަކަށް އައުމަށް މަގުފަހިވި އެވެ.
2011 ވަނަ އަހަރު އޮސްލޯއަށާއި އުޓޯޔާ ރަށަށް ދިން ބޮމުގެ އަދި ބަޑީގެ ހަމަލާތަކުގައި 77 މީހުން މަރުވި ހިތާމަވެރި ހާދިސާގައި، ބައްޕައެއްގެ، ފިރިއެއްގެ އަދި ރަސްކަލެއްގެ ހައިސިއްޔަތުން އަނިޔާ ލިބުނު އާއިލާތަކުގެ ހިތާމައިގައި ބައިވެރިވެވަޑައިގެން، ކީރިތި ކުރައްވަމުން އެމަނިކުފާނު ދެއްވި ތަގުރީރު ވެގެންދިޔައީ އެމަނިކުފާނުގެ ރަސްކަމުގެ އެންމެ ހަނދާނުގައި ހުންނާނެ ވަގުތުކޮޅަށެވެ. އަދި 2016 ވަނަ އަހަރު ދީނީ މިނިވަންކަމާއި ނަސްލީ ތަފާތުކުރުންތަކާ ދެކޮޅަށް ދެއްވި ތަގުރީރުން ދުނިޔޭގެ ސަމާލުކަން ލިބުނެވެ. އެ ތަގުރީރުގައި ނޯވޭގެ ރައްޔިތުންނަކީ އަފްޣާނިސްތާނާއި، ޕާކިސްތާނާއި، ސީރިއާ ފަދަ ގައުމުތަކުން އައިސްފައިވާ، އެކަކު އަނެކަކު ދެކެ ލޯބިވާ ބައެއް ކަމަށް އެމަނިކުފާނު ވިދާޅުވި އެވެ.
ފަހަކަށް އައިސް ޝާހީ އާއިލާއަށް ބޮޑެތި ގޮންޖެހުންތަކެއް ކުރިމަތިވި އެވެ. ޚާއްސަކޮށް ޅީދަރިކަނބަލުން މެޓޭ-މާރިޓްއާ ޖިންސީ ކުށްވެރިޔާ ޖެފްރީ އެޕްސްޓީންއާ އޮތް ގުޅުމާއި، އެކަމަނާގެ ދަރިކަލުން މާރިއަސް ބޯގް ހޮއިބީގެ މައްޗަށް ރޭޕްގެ ކުށް ސާބިތުވެ ހަތަރު އަހަރަށް ޖަލަށްލުމަށް ހުކުމްކުރި މައްސަލައިގެ ސަބަބުން ޝާހީ އާއިލާގެ މަގުބޫލުކަން 72 އިންސައްތައިން 54 އިންސައްތައަށް ދަށަށް ގޮސްފައިވެ އެވެ. ނަމަވެސް ތާރީޚު ދިރާސާކުރާ ފަރާތްތަކުން ބުނާ ގޮތުގައި، މި ކަންކަމުގެ އެއްވެސް އިލްޒާމެއް ރައްޔިތުން ރަސްގެފާނު ހަރަލްޑްގެ ބޮލުގައި ނާޅުވަ އެވެ.
ރަސްކަމުގެ ޒިންމާތަކާ މިހާރު ހަވާލުވެވަޑައިގެންފައިވަނީ 53 އަހަރުގެ ދަރިކަލުން ރަސްގެފާނު ހާކޮން އެވެ. އަނބިކަނބަލުން މެޓޭ-މާރިޓް ފުއްޕާމޭ ބަދަލުކުރުމުގެ އޮޕަރޭޝަނަކުން ފަސޭހަވަމުންދާ ދަނޑިވަޅެއްގައި ރަސްކަމާ ހަވާލުވެވަޑައިގަންނަވާ ހާކޮންއަށް ބޮޑެތި ގޮންޖެހުންތަކާ ކުރިމަތިލައްވަން ޖެހިވަޑައިގަންނަވާނެ ކަމަށް ބެލެވެ އެވެ. އަވަހާރަވިއިރު ހަރަލްޑްގެ އަނބިކަނބަލުން ކުއީން ސޯންޔާއާއި، ދެ ދަރިކަލުންނާއި ހަ ކާފަދަރިކަލުން ދުނިޔޭގައި އެބަތިއްބެވި އެވެ.
ކޮމެންޓު ފޮނުވާ