ހެންވޭރު ގެއެއްގައި ހުރި އެޕާޓްމަންޓެއްގައި ރޭ ރޯވި އަލިފާނުގެ ހާދިސާއާ ގުޅިގެން، އެ ތަނުގައި ދިރިއުޅެމުން ދިޔަ މީހުންނަށް ވަގުތީ ހިޔާވަހިކަމާއި ކެއިންބުއިމުގެ އިންތިޒާމު ހަމަޖައްސައިދީފި އެވެ.
މި ހާދިސާ ހިނގީ ހ. ފަހިވަހި ނަމަކަށް ކިޔާ ގެއެއްގެ ހަތްވަނަ ފަންގިފިލާގައި ހުންނަ ތިން ކޮޓަރީގެ އެޕާޓްމަންޓެއްގަ އެވެ. މި ހާދިސާގައި އެ އެޕާޓްމަންޓު ބޭނުންނުކުރެވޭ ވަރަށް އަނދާފައިވާއިރު، ޢިމާރާތުގެ ބައެއް ފަންގިފިލާތަކަށް ދުމުގެ އަސަރު ފޯރި ނަމަވެސް، މީހުންނަށް ދިރިނޫޅެވޭ ވަރުގެ ގެއްލުމެއް ނުވާ ކަމަށާއި، ދުމުގެ އަސަރެއް މިހާރު އެ ފަންގިފިލާތަކުގައި ނެތް ކަމަށް އެންޑީއެމްއޭއިން ބުނެފައިވެ އެވެ.
އެންޑީއެމްއޭއިން ބުނީ، މި ހާދިސާގައި އެއްވެސް މީހަކަށް އަނިޔާވެފައި ނުވާ ކަމަށާއި، އެޕާޓްމަންޓުގައި ދިރިއުޅެމުން ދިޔަ ތިން އަންހެނުންނާއި ފިރިހެނަކަށް ފަސް ދުވަހަށް ބޭނުންވާ ވަރަށް ކެއިންބުއިމުގެ އިންތިޒާމު ހަމަޖައްސައިދީފައިވާ ކަމަށެވެ.
ފުލުހުން ބުނީ، މި ހާދިސާ ހިނގި ސަރަހައްދުގައި ހަރަކާތްތެރިވި ފުލުހެއްގެ އަތް ކަނޑައިގެންގޮސް އަނިޔާވުމާ ގުޅިގެން އޭޑީކޭ ހޮސްޕިޓަލުގައި ފަރުވާ ދެމުން ދިޔަ ކަމަށާއި، ނަމަވެސް ސީރިއަސް އަނިޔާއެއް ލިބިފައި ނުވާ ކަމަށެވެ.
މި ހާދިސާ ހިނގަން މެދުވެރިވި ސަބަބު އަދި ނޭނގެއެވެ.
ކޮމެންޓު ފޮނުވާ