ބަންގްލަދޭޝްގެ ބޮޑުވަޒީރު ތާރިގު ރަހްމާން އިންޑިއާއާ އެކު އޮތް ގުޅުން އިތުރަށް ބަދަހިކުރުމަށް އެކަށީގެންވާ މާހައުލެއް ގާއިމުކުރަން ޖެހޭ ކަމަށާއި، ކުރީގެ ބޮޑުވަޒީރު ޝޭހް ހަސީނާ ބަންގްލަދޭޝްއާ ހަވާލުކުރަން ޖެހޭ ކަމަށް އިއްޔެ ވިދާޅުވެއްޖެ އެވެ.
ތާރިގު މިހެން ވިދާޅުވީ، އިންޑިއާއިން ބަންގްލަދޭޝްއަށް އަލަށް ކަނޑައެޅުއްވި ހައި ކޮމިޝަނަރު ދިނޭޝް ޓްރިވެދީ، ފުރަތަމަ ފަހަރަށް ބޮޑުވަޒީރާ ބައްދަލުކުރެއްވުމަށް ވަޑައިގެންނެވި ބައްދަލުވުމުގަ އެވެ. މި ބައްދަލުވުމަކީ، އަވަށްޓެރި އެންމެ ބޮޑު ގައުމާ އެކު އޮތް ގުޅުން އަލުން ހަމައަކަށް އަޅުވައި ވަރުގަދަކުރުމަށް ދާކާއިން ކުރަމުން އަންނަ މަސައްކަތުގެ ތެރެއިން ބޭއްވި ބައްދަލުވުމެކެވެ.
ބޮޑުވަޒީރުގެ އޮފީހުން ބުނީ ދެ ގައުމުގެ ދެމެދުގައި އޮތް ގުޅުން ކުރިއަށް ގެންދިއުމަށްޓަކައި، އެކަށީގެންވާ މާހައުލެއް ބިނާކުރުމުގެ މުހިންމުކަމުގެ މައްޗަށް ތާރިގު އަލި އަޅުއްވާލެއްވި ކަމަށެވެ. އަދި މީގެ އިތުރުން، ހަސީނާ ބަންގްލަދޭޝްއާ ހަވާލުކުރުމުގެ ކަންކަން އަވަސްކޮށްދިނުމަށް ވެސް އެ ބައްދަލުވުމުގައި ތާރިގު އެދިވަޑައިގެންނެވި އެވެ.
އޮގަސްޓް 2024ގައި ބޮޑެތި މުޒާހަރާތަކާ ގުޅިގެން ހަސީނާގެ ސަރުކާރު ވެއްޓުނު ފަހުން، އޭނާ ދިރިއުޅުއްވަމުން ގެންދަވަނީ އިންޑިއާގަ އެވެ. މިދިޔަ ނޮވެމްބަރު މަހު ބަންގްލަދޭޝްގެ ކޯޓަކުން ވަނީ އޭނާގެ މައްޗަށް މަރުގެ ހުކުމް އިއްވާފަ އެވެ. މިއީ މިހާރު ދާކާ އާއި ނިއު ދިއްލީއާ ދެމެދު އުފެދިފައިވާ ނުތަނަވަސްކަމުގެ މައިގަނޑު އެއް ސަބަބެވެ.
ހަސީނާ ހަވާލުކުރުމަށް ބަންގްލަދޭޝްއިން އަނެއްކާވެސް އެދިފައި މިވަނީ، އޭނާ ގައުމު ދޫކުރެއްވި ފަހުން މީޑިއާއަކާ ބޭއްވެވި ފުރަތަމަ މުއާމަލާތުގައި، ކުރިއަށް އޮތް ޑިސެމްބަރު މަހު އެނބުރި ބަންގްލަދޭޝްއަށް ވަޑައިގަންނަވާނެ ކަމަށް ވިދާޅުވެފައި ވަނިކޮށެވެ. ހަސީނާއަށް އެފަދަ ސިޔާސީ ހަރަކާތްތައް ހިންގުމުގެ ފުރުސަތު ދިނުމުން، އިންޑިއާއަށް ބަންގްލަދޭޝްއިން ވަނީ ފާޑުކިޔައި، އެއީ ވަރަށް ބޮޑަށް ހިތާމަކުރާ ކަމެއް ކަމަށް ބުނެފަ އެވެ.
އަނެއްކޮޅުން އިންޑިއާއިން ބުނަމުން އަންނަނީ، ހަސީނާ ހަވާލުކުރުމަށް ބަންގްލަދޭޝްއިން ހުށަހަޅާފައިވާ އެދުން ދިރާސާކުރަމުން އަންނަނީ ގާނޫނީ އަދި ޝަރުއީ އިޖުރާއަތްތަކުގެ ތެރެއިން ކަމަށެވެ. މީގެ އިތުރުން، ބަންގްލަދޭޝްއާ އެކު ކުރިއަށް އޮތް ތަނުގައި ވެސް، ދެމެހެއްޓެނިވި އަދި އުފެއްދުންތެރި ގުޅުމެއް ބިނާކުރުމަށް މަސައްކަތްކުރައްވާނެ ކަމުގައި، ދާކާގައި ހުންނަ އިންޑިއާގެ ހައި ކޮމިޝަނުން ބުނެ އެވެ.
ކޮމެންޓު ފޮނުވާ