ލ. ހިތަދޫން ތަކުރާރުކޮށް ކަރަންޓު ކެނޑޭ މައްސަލައަށް ހައްލެއް ނުލިބި ދިގުލައިގެންދާތީ، ފެނަކަ ކޯޕަރޭޝަންގެ މެނޭޖިންގް ޑިރެކްޓަރު މުހައްމަދު އަފީފް ހުސައިން ރައްޔިތުންގެ މަޖިލީހަށް ހާޒިރުކޮށްދެއްވުމަށް މާވަށު ދާއިރާގެ މެންބަރު އަހްމަދު ޝާކިރު އެދިވަޑައިގެންފިއެވެ.
މަޖިލީހުގެ ރައީސް އަބްދުއްރަހީމް އަބްދުﷲ އަށް އެމްޑީޕީއަށް ނިސްބަތްވެވަޑައިގަންނަވާ ޝާކިރު ފޮނުއްވި ސިޓީގައި އެދިވަޑައިގެންފައިވަނީ، ސްޓޭޓް އޯންޑް އެންޓަޕްރައިސަސް (އެސްއޯއީ) ކޮމިޓީގެ ބައްދަލުވުމެއް އަވަހަށް ބާއްވައި، އެ ބައްދަލުވުމަށް އަފީފް ހާޒިރުކުރެއްވުމަށެވެ. ޝާކިރު ވިދާޅުވި ގޮތުގައި މި މައްސަލަ ސީދާ ގުޅިފައި ވަނީ ރައްޔިތުންގެ ދިރިއުޅުމާއެވެ.
ގާތްގަނޑަކަށް 1000 މީހުންގެ އާބާދީއެއް ދިރިއުޅޭ ހިތަދޫގައި ކަރަންޓުގެ މައްސަލަ ފެންމަތިވާން ފެށީ މީގެ ހަ މަސް ދުވަސް ކުރިންނެވެ. ރަށުގައި ބޭނުންކުރާ ތިން ޖަނަރޭޓަރުގެ ތެރެއިން، 600 ކިލޯވޮޓުގެ އެންމެ ބޮޑު ޖަނަރޭޓަރު ހިމެނޭހެން ދެ ޖަނަރޭޓަރެއް ހަލާކުވެފައިވުމުގެ ސަބަބުން، ކޮންމެ 30 މިނެޓަކުން ކަރަންޓު ކެނޑޭކަމަށް ސިޓީގައި ޝާކިރު ފާހަގަކުރެއްވިއެވެ. ބާކީ ހުރި ދެ ޖަނަރޭޓަރުން މުޅި ރަށަށް އެއްފަހަރާ ކަރަންޓު ފޯރުކޮށްނުދެވޭތީ، ދެ ލޭނަކަށް ބަހާލައި، ކޮންމެ އެއްގަޑިއިރަކުން ބަދަލުކޮށްގެން ކަރަންޓު ދެމުން އަންނަކަމަށް ފެނަކައިގެ ހިތަދޫ ބްރާންޗުން ވަނީ ބުނެފައެވެ.
މީގެ ސަބަބުން ރައްޔިތުންގެ އާންމު ދިރިއުޅުމަށް ބޮޑެތި ދަތިތަކާ ކުރިމަތިލާން ޖެހި، ގޭގޭގައި ބޭނުންކުރާ އަގުބޮޑު އިލެކްޓްރޯނިކް ސާމާނުތަކަށް އިއާދަނުކުރެވޭ ފަދަ ގެއްލުންތަކެއް ލިބެމުންދާ ކަމަށް ވެސް ޝާކިރު ވިދާޅުވިއެވެ. މި މައްސަލައަށް ދާއިމީ ހައްލެއް ހޯއްދަވައި ދެއްވުމަށް ސަރުކާރު ނުކުޅެދިފައިވާ ކަމަށް ތުހުމަތުކުރައްވަމުން، ޝާކިރު ވަނީ ސަރުކާރުން ކުރަމުންދާ ބޭކާރު ހަރަދުތައް ހުއްޓާލައި، ގާނޫނުއަސާސީން ރައްޔިތުންނަށް ލާޒިމުކޮށްފައިވާ އަސާސީ ހައްގުތައް އެއްވެސް ތަފާތުކުރުމެއްނެތި ފޯރުކޮށްދިނުމަށް ގޮވާލައްވާފައެވެ.
ކޮމެންޓު ފޮނުވާ