މާލެ ސަރަޙައްދުގެ މަގުތައް ތޮއްޖެހުމުގެ މައްސަލައަށް ދާއިމީ ޙައްލެއް ހޯދުމުގެ ގޮތުން، "ގްރޭޓަރ މާލެ ޓްރާންސްޕޯޓް އެންޑް މޮބިލިޓީ އޮފީސް"ގެ ނަމުގައި ޚާއްޞަ އިދާރާއެއް އުފައްދައި، 11 ދާއިރާއަކުން ފުޅާ މަޝްރޫޢެއް ފެށުމަށް ސަރުކާރުން ނިންމައިފިއެވެ.
މި އޮފީހުގެ މަސައްކަތްތަކާ ގުޅޭގޮތުން ނޫސްވެރިންނަށް މަޢުލޫމާތު ދެއްވަމުން، އިޤްތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވީ، މާލޭގެ ޓްރެފިކްގެ މައްސަލައަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޚާއްޞަ އިސްކަމެއް ދެއްވާ ކަމެއް ކަމަށާއި، މި މައްސަލަ ޙައްލުކުރުމަށް ބޭނުންވާ ވަޞީލަތްތައް ސަރުކާރުގައި މިހާރު ހުރި ކަމަށެވެ. ވަޒީރު ވިދާޅުވީ މާލެ ސަރަޙައްދުގެ އާބާދީ ދުވަހެއް ދުވަހަކަށް އިތުރުވަމުންދާއިރު، އޭގެ ސްޕީޑުގައި އުޅަނދުފަހަރުގެ ޢަދަދުވެސް އިތުރުވަމުންދާ ކަމަށާއި، މި ބޮޑު މައްސަލައަށް ދެކޮޅު ޖެހޭ ދެމެހެއްޓެނިވި ޙައްލެއް ހޯދުމަށްޓަކައި ފުޅާދާއިރާއެއްގައި ކަމާބެހޭ މުއައްސަސާތަކާއި ޢާންމު ރައްޔިތުންގެ ޚިޔާލު ހޯދަން ޖެހިއްޖެ ޙާލަތެއްގައި އެކަން ކުރައްވާނެ ކަމަށެވެ.
ގްރޭޓަރ މާލެ ޓްރާންސްޕޯޓް އެންޑް މޮބިލިޓީ އޮފީހަކީ ގަވަރނިންގ ބޯޑެއްގެ ލަފާގެ ދަށުން ހިންގާ އިދާރާއެއް ކަމަށާއި، އެ ބޯޑު އެކުލަވާލުމުގެ މަސައްކަތް މިހާރު ކުރިއަށްދާ ކަމަށް ވަޒީރު ވިދާޅުވިއެވެ. މި މަޝްރޫޢުގައި، އިޤްތިޞާދީ ތަރައްޤީއާ ބެހޭ ވުޒާރާގެ އިތުރުން، ފުލުހުންނާއި، ހައުސިންގ ޑިވެލޮޕްމަންޓް ކޯޕަރޭޝަން (އެޗް.ޑީ.ސީ)އާއި، ބިނާރާއި ގެދޮރުވެރިކަމާއި ޢުމްރާނީ ތަރައްޤީއާ ބެހޭ ވުޒާރާއާއި، މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާގެ އިތުރުން މާލޭ ސިޓީ ކައުންސިލްވެސް ޙިއްޞާވާނެއެވެ.
މި މަޝްރޫޢުގެ ދަށުން ޤާނޫނީ އޮނިގަނޑަށް އިޞްލާޙު ގެނައުމާއި، ދަތުރުފަތުރުގެ ޚިދުމަތްތައް ޑިޖިޓަލައިޒް ކުރުމާއި، ޢާންމުން ހޭލުންތެރިކުރުވުމުގެ ޕްރޮގްރާމްތައް ހިންގުމުގެ އިތުރުން، މަގުތައް ހެދުމާއި ޓްރެފިކް ސައިންތައް ބެހެއްޓުމުގެ މަސައްކަތްތައް ކުރެވޭނެއެވެ. ހަމައެއާއެކު ޓްރެފިކްގެ ދައުރުވުން ރަނގަޅުކުރުމާއި، ޓްރެފިކް މެނޭޖްމަންޓް ސެންޓަރެއް ޤާއިމުކުރުމާއި، ޕާކިންގގެ މައްސަލައަށް އައު ޙައްލުތައް ހޯދުމުގެ މަސައްކަތްވެސް ކުރެވޭނެއެވެ. މީގެ އިތުރުން ޢާންމު ދަތުރުފަތުރުގެ ނިޒާމު ފުޅާކޮށް ޚާއްޞަ ބަސް ރޫޓުތައް ތަޢާރަފުކުރުމާއި، އޮޓޮމޭޓެޑް ވެހިކަލް އިންސްޕެކްޝަން ސިސްޓަމެއް ޤާއިމުކުރުމާއި، ބޭނުންނުކުރެވޭ އުޅަނދުފަހަރު ބަހައްޓާނެ ފެސިލިޓީއެއް ޤާއިމުކުރުމުގެ އިތުރުން، އާރބަން ޕްލޭނިންގއާއި ސިޓީ މެނޭޖްމަންޓްގެ ދާއިރާއިންވެސް ފުޅާ މަސައްކަތްތަކެއް ކުރެވޭނެއެވެ.
އެންމެ ފަހުގެ ބޯހިމެނުމުގެ ތަފާސްހިސާބުތަކުން ދައްކާ ގޮތުގައި، މާލެ ސަރަޙައްދުގައި 254,557 މީހުން ދިރިއުޅެމުންދާއިރު، މި ސަރަޙައްދުގައި ބޭނުންކުރާ އުޅަނދުފަހަރުގެ ޢަދަދު ވަނީ 131,689އަށް އަރައިފައެވެ. ޙައިރާންވާ ފަދަ ގޮތަކަށް، މާލެ ސަރަޙައްދުގެ 82 އިންސައްތަ ބޭނުންކުރެވެނީ އުޅަނދު ޕާކުކުރުމަށާއި ދުއްވުމަށް ކަމަށާއި، މީހުން ހިނގާބިނގާވެ އުޅުމަށް ބޭނުންކުރެވެނީ އެންމެ 18 އިންސައްތަ ސަރަޙައްދެއް ކަމަށް ތަފާސްހިސާބުތަކުން ދައްކައެވެ.
މާލެ ސަރަޙައްދުގެ ދަތުރުފަތުރުގެ ނިޒާމު ޒަމާނީކޮށް، ޕާކުކުރެވޭނެ ވަޞީލަތްތަކާއި އެހެނިހެން ޒަމާނީ ޙައްލުތައް ހޯދައި ތަރައްޤީ ކުރުމުގައި މި އައު އޮފީހުން އިސް ދައުރެއް އަދާކުރާނެ ކަމަށާއި، ކަމާބެހޭ ފަރާތްތަކަށް ސިޔާސަތުތައް އެކުލަވައިލުމުގައި ލަފާ ދިނުމަކީވެސް އޮފީހުގެ މައިގަނޑު މަސްއޫލިއްޔަތެއް ކަމަށް ވަޒީރު ސަޢީދު ފާހަގަކުރެއްވިއެވެ.
ކޮމެންޓު ފޮނުވާ