ބޮސްޓަންގައި ކުޅުނު ވޯލްޑް ކަޕް ފުޓްބޯޅަ މުބާރާތުގެ ގްރޫޕް ސީގެ މެޗުގައި 1-0 ގެ ނަތީޖާއަކުން ސްކޮޓްލޭންޑް ބަލިކޮށް މޮރޯކޯއިން މުހިންމު މޮޅެއް ހޯދައިފިއެވެ.
މި މެޗުގެ ހަމައެކަނި ލަނޑު މޮރޯކޯއަށް ކާމިޔާބުކޮށްދިނީ މެޗުގެ ވަރަށް ކުރީކޮޅު އިސްމާއިލް ސައިބާރީއެވެ. މިއީ ސްކޮޓްލޭންޑްގެ ޑިފެންޑަރު ގްރާންޓް ހެންލީއަށް ހެދުނު ގޯހެއްގެ ފައިދާ ނަގައި އޭނާ ކާމިޔާބުކުރި ލަނޑެކެވެ. ފުރަތަމަ ލަނޑު ޖެހިތާ ގިނައިރުތަކެއް ނުވަނީސް ނަތީޖާ އިތުރަށް ފުޅާކޮށްލަން ވެސް ސައިބާރީއަށް ރަނގަޅު ފުރުސަތެއް ލިބިފައިވެއެވެ.
މުޅި މެޗުގައިވެސް މާ ގިނަ ނުރައްކާތެރި ހަމަލާތަކެއް ފެނިގެން ގޮސްފައި ނުވި ނަމަވެސް، މޮރޯކޯއިން ދޭތެރެއަކުން ސްކޮޓްލޭންޑްގެ ގޯލަށް ނުރައްކާކޮށްފައިވެއެވެ. މި މެޗުގައި އެންމެ ބޮޑަށް ފާހަގަވެގެން ދިޔައީ ސްކޮޓްލޭންޑަށް ލިބެންޖެހޭ ކަމަށް ބެލެވުނު ޕެނަލްޓީއެއްގެ މައްސަލައެވެ.
މި ނަތީޖާއާއެކު ގްރޫޕް ސީ އިން އަނެއް ބުރަށް ދިއުމުގެ އެންމެ ބޮޑު ފުރުސަތެއް މިހާރު އޮތީ ބްރެޒިލް އަދި މޮރޯކޯއަށެވެ. އެހެންނަމަވެސް، ކުރިއަށް އޮތް ތަނުގައި ނަތީޖާ ނެރެގެން މުބާރާތުގައި ކުރިއަށް ދިއުމުގެ އުންމީދު ސްކޮޓްލޭންޑަށް ވެސް އަދި އެބައޮތެވެ.
ކޮމެންޓު ފޮނުވާ