މުޖުތަމަޢަށް ފައިދާހުރި މަޝްރޫޢުތައް ހިންގުމަށް ބޭންކް އޮފް މޯލްޑިވްސް (ބީއެމްއެލް) އިން ދޫކުރާ ހިލޭ އެހީ، 'ބޭންކް ފަންޑު' އަށް އެދި ހުށަހެޅުމުގެ ސުންގަޑި ކުރިއަށް އޮތް އާދީއްތަ ދުވަހަށް ހަމަވާނެއެވެ.
ރާއްޖޭގައި ރަޖިސްޓަރީކޮށްގެން ހިންގާ ޖަމިއްޔާތަކާއި ކްލަބްތަކަށް އަމާޒުކޮށްގެން ބީއެމްއެލްއިން ކުރިއަށްގެންދާ މި ފަންޑަކީ ދެމެހެއްޓެނިވި އިޖުތިމާޢީ މަސައްކަތްތަކަށް މާލީ އެހީތެރިކަން ފޯރުކޮށްދިނުމަށް 2024 ވަނަ އަހަރު ތަޢާރަފުކުރި ޕްރޮގްރާމެކެވެ. ކޮންމެ އަހަރަކުވެސް ކުރިއަށްގެންދާ މި ފަންޑަށް މިއަހަރު ކުރިމަތިލުމުގެ ފުރުސަތު ހުޅުވާލާފައިވަނީ މިދިޔަ މަހުގެ 13 ވަނަ ދުވަހުއެވެ.
މި ފަންޑުގެ ދަށުން ހުށަހަޅާ ޕްރޮޕޯސަލްތަކުގެ ތެރެއިން އެންމެ ފާހަގަކޮށްލެވޭ ރަނގަޅު 5 މަޝްރޫޢެއް ހޮވައި، ކޮންމެ މަޝްރޫޢެއް ހިންގުމަށް 200,000 ރުފިޔާގެ ހިލޭ އެހީ ދިނުމަށް ވަނީ ހަމަޖެހިފައެވެ. މި އެހީ މައިގަނޑު ގޮތެއްގައި ދޫކުރާނީ ތަޢުލީމީ ދާއިރާއާއި، ތިމާވެށި ހިމާޔަތްކުރުމާއި، ކުޅިވަރުގެ އިތުރުން މުޖުތަމަޢަށް ލާބަހުރި އެހެނިހެން އިޖުތިމާޢީ ކަންކަމާ ގުޅޭ މަޝްރޫޢުތަކަށެވެ.
އެހެންކަމުން، މި އެހީއަށް އެދޭ ފަރާތްތަކުން 14 ޖޫން 2026 ވާ އާދީއްތަ ދުވަހުގެ މެންދުރުފަހު 2:00 ގެ ކުރިން އެޕްލިކޭޝަން ފޯމާއި ޕްރޮޕޯސަލްތައް ބީއެމްއެލްގެ އީމެއިލް ([email protected]) އަށް ފޮނުވުމަށް އެ ބޭންކުން އެދެއެވެ. މި ފަންޑާ ގުޅޭ އިތުރު މަޢުލޫމާތާއި އުސޫލުތައް ބޭންކް އޮފް މޯލްޑިވްސްގެ ރަސްމީ ވެބްސައިޓުން ލިބެން ހުންނާނެއެވެ.
ކޮމެންޓު ފޮނުވާ