ނ. ލަންދޫގައި އާދަޔާޚިލާފަށް ހުމުގެ ރޯގާއެއް ފެތުރެމުންދާތީ، އެއީ ކޮން ބައްޔެއްތޯ ދެނެގަތުމަށް ކޮވިޑް-19 އާއި އިންފްލުއެންޒާއަށް ޓެސްޓުކުރުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ލަފާދީފިއެވެ.
އެ ރަށު ސިއްހީ މަރުކަޒުން މައުލޫމާތު ދޭގޮތުގައި، މިދިޔަ ހައްޖު ދުވަހުން ފެށިގެން ބަލިވެގެން ޑޮކްޓަރަށް ދައްކާ މީހުންގެ އަދަދު ވަނީ ދެގުނައަށް އިތުރުވެފައެވެ. ކުރިން ދުވާލަކު 10 ވަރަކަށް މީހުން ފަރުވާ ހޯދި ނަމަވެސް، މިހާރު އެ އަދަދު ވަރަށް ބޮޑަށް އިތުރުވެ، އެޑްމިޓްކޮށްގެން ފަރުވާދޭންޖެހޭ މީހުންވެސް އަންނަނީ ގިނަވަމުންނެވެ. މި ބަލިމަޑުކަމުގެ އަސަރު ރަށު ސްކޫލަށްވެސް ކޮށްފައިވާއިރު، 200 އެއްހާ ކުދިން ކިޔަވާ ސްކޫލަށް އިއްޔެ ހާޒިރުވީ އެންމެ 150 ދަރިވަރުންނެވެ.
ކުދިން ހާޒިރުވާ ނިސްބަތް ދަށްވުމުން ސްކޫލް ބަންދުކުރުމަށް ސިއްހީ މަރުކަޒުން އެދުނު ނަމަވެސް، އެޗްޕީއޭއިން ލަފާދިނީ ޓެސްޓުތައް ހެދުމަށްފަހު ގޮތެއް ނިންމުމަށެވެ. ނަމަވެސް، މޫސުން ގޯސްވެ ކަނޑުގަދަވުމުގެ ސަބަބުން އަތޮޅު ހޮސްޕިޓަލުގައި ހުރި ޓެސްޓު ކިޓުތައް ރަށަށް ގެނައުމުގައި ލަސްތަކެއް ކުރިމަތިވެ، ޓެސްޓުކުރުން އަދި ވަނީ ނުފެށިއެވެ. މިހާރު ފެތުރެމުންދާ ރޯގާގެ މައިގަނޑު އަލާމާތްތަކުގެ ތެރޭގައި ގަދަޔަށް ހުން އައުމާއި، ކެއްސުމާއި ބޮލުގައި ރިއްސުން ހިމެނެއެވެ.
ރާއްޖޭގެ އެކި ކަންކޮޅުތަކުގައި ޑެންގީ އާއި އިންފްލުއެންޒާ އަދި ހިމަބިހި ފަދަ ބަލިތައް ފެތުރެމުންދާތީ، އެޗްޕީއޭއިން ވަނީ އާންމު ސިއްހަތު ރައްކާތެރިކުރުމުގެ ފިޔަވަޅުތައް އެޅުމަށް އިލްތިމާސްކޮށްފައެވެ. އެގޮތުން، ނޭވާލާ ނިޒާމުގެ ބަލީގެ އަލާމާތެއް ހުރިނަމަ ގޭގައި މަޑުކުރުމަށާއި، މީހުން ގިނައިން އެއްވާ ތަންތަނަށް ނުދިއުމަށާއި، މާސްކު އެޅުމުގެ އިތުރުން ސައިބޯނި ލައިގެން ގިނަގިނައިން އަތްދޮވުމަށް އެ އެޖެންސީން ވަނީ އިރުޝާދު ދީފައެވެ.
ކޮމެންޓު ފޮނުވާ