އިނގިރޭސިވިލާތަށް ބޭރުކުރާ ދިވެހި މަހުން ޓެރިފް ކަނޑާލުމަކީ މަސްވެރިންނަށް ލިބުނު ބޮޑު ކުރިއެރުމެއް: ރައީސް

މިއަދުން ފެށިގެން ރާއްޖެއިން އިނގިރޭސިވިލާތަށް އެތެރެކުރާ ކަނޑުމަހުގެ ބާވަތްތަކުން ނަގަމުން އައި ޓެރިފް އެ ގައުމުން ކަނޑާލައިފިއެވެ.

މި މުހިންމު ނިންމުމަށް މަރުހަބާ ވިދާޅުވެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފާހަގަކުރެއްވި ގޮތުގައި، މިއީ ވޭތުވެދިޔަ 12 ވަރަކަށް އަހަރު ދުވަހުގެ ތެރޭގައި ރާއްޖޭގެ އެކި ސަރުކާރުތަކުން ކުރަމުން އައި ގިނަ މަސައްކަތްތަކެއްގެ އުފާވެރި ނިމުމެވެ.

ސޯޝަލް މީޑިއާ ޕްލެޓްފޯމް 'އެކްސް' ގައި ކުރެއްވި ޕޯސްޓެއްގައި ރައީސް ވިދާޅުވީ، ޓެރިފް ކަނޑާލުމަކީ އިނގިރޭސިވިލާތުގެ ކަސްޓަމަރުންނަށް ލިބިގެންދާނެ ވަރަށް ބޮޑު ލުޔެއް ކަމަށެވެ. އަދި ހަމައެއާއެކު، މިއީ ރާއްޖޭގެ އިޤްތިޞާދުގެ މައިގަނޑު އެއް ތަނބު ކަމަށްވާ މަސްވެރިކަމުގެ ސިނާއަތަށް ލިބުނު ވަރަށް މުހިންމު ކުރިއެރުމެއްކަން އެމަނިކުފާނު ސިފަކުރެއްވިއެވެ.

މި ބަދަލުގެ ސަބަބުން ދިވެހި މަސްވެރިންނަށް ލިބޭ އާމްދަނީ އިތުރުވެ، ރަށްރަށުގެ އާންމު ދިރިއުޅުމުގެ ހާލަތު އިތުރަށް ރަނގަޅުވެގެންދާނެކަމުގެ ޔަޤީންކަން ރައީސް ދެއްވިއެވެ. މީގެ އިތުރުން، ދެމެހެއްޓެނިވި ގޮތެއްގައި ރާއްޖެއިން ބާނާ ތާޒާ މަހަށް އިނގިރޭސިވިލާތުގެ ބާޒާރުގައި އޮންނަ ޑިމާންޑް ބޮޑުވެ، ވިޔަފާރީގެ އައު ފުރުސަތުތައް ދިވެހިންނަށް ފުޅާވެގެންދާނެ ކަމަށްވެސް ރައީސް ޑރ. މުޢިއްޒު ވަނީ ވިދާޅުވެފައެވެ.