ހަންގޭރީގައި ފާއިތުވި 16 އަހަރު ވަންދެން ވެރިކަން ކުރެއްވި ނޭޝަނަލިސްޓް ލީޑަރު ވިކްޓާ އޯބަންއަށް، އެ ޤައުމުގައި ބޭއްވި އާންމު އިންތިޚާބުގައި ބޮޑު ނާކާމިޔާބީއަކާ ކުރިމަތިލައްވަން ޖެހިވަޑައިގެންފިއެވެ.
މި އިންތިޚާބުގައި ތާރީޚީ ބޮޑު ކާމިޔާބީއެއް ހޯދާފައިވަނީ ޕީޓާ މަގްޔާރް އިސްވެ ހުންނަވައި އަލަށް އުފެއްދެވި، ޔޫރަޕިއަން ޔޫނިއަން (އީޔޫ) އަށް ތާއީދުކުރާ ސެންޓަރ ރައިޓް ޕާޓީއެއް ކަމަށްވާ 'ޓިސްޒާ' އިންނެވެ. ވޯޓުގެ 46 އިންސައްތަ ގުނާފައިވާއިރު، ޤާނޫނުހަދާ މަޖިލީހުގެ 199 ގޮނޑީގެ ތެރެއިން 135 ގޮނޑި އެ ޕާޓީން ވަނީ ކަށަވަރުކޮށްފައެވެ. މިއީ ޤާނޫނުއަސާސީއަށް ބަދަލު ގެނައުމަށް ބޭނުންވާ ތިންބައިކުޅަ ދެބައިގެ ސާފު އަޣުލަބިއްޔަތެކެވެ. މި ނަތީޖާއާއެކު އޯބަންގެ ފިޑޭޒް ޕާޓީއަށް ވަނީ ލަދުވެތި ބައްޔަކާ ކުރިމަތިވެފައެވެ.
ރަޝިޔާއާއި އެމެރިކާގެ ރައީސް ޑޮނަލްޑް ޓްރަމްޕާ ގާތް ގުޅުމެއް ބާއްވަވާ އޯބަން ވަނީ، ފައިނަލް ނަތީޖާ ނުލިބުނު ނަމަވެސް މަސްރަހު ސާފުވެއްޖެކަމަށް ވިދާޅުވެ ބަލިޤަބޫލުކުރައްވާފައެވެ. އޭނާ ވިދާޅުވީ މިއީ ހިތްދަތި ނަތީޖާއެއް ނަމަވެސް، މިއީ ރައްޔިތުންގެ ސާފު ނިންމުން ކަމަށެވެ. މިއަހަރުގެ އިންތިޚާބުގައި ވޯޓުލީ މީހުންގެ ނިސްބަތް ވަނީ ރެކޯޑު މިންވަރަކަށް އިތުރުވެފައެވެ. އެގޮތުން ވޯޓުލުމުގެ ޙައްޤު ލިބިފައިވާ މީހުންގެ 77.8 އިންސައްތަ މީހުން ވޯޓުލާފައިވާއިރު، މިއީ މީގެ ހަތަރު އަހަރު ކުރިން ބޭއްވި އިންތިޚާބާ އަޅާބަލާއިރު 10 އިންސައްތައިގެ ބޮޑު ކުރިއެރުމެކެވެ.
އޯބަންގެ ދިގުލީ ވެރިކަން ނިމުމަކަށް އައުމަކީ ހަމައެކަނި ހަންގޭރީއަށް އައި ބަދަލެއް ނޫނެވެ. މިއީ މުޅި ޔޫރަޕަށާއި ޔޫކްރެއިން ހަނގުރާމައަށްވެސް އޭގެ ފުން އަސަރުކުރާނެ ކަމެކެވެ. މި ބަދަލާއެކު، އީޔޫގެ ތެރޭގައި ހަންގޭރީން ގެންގުޅުނު ދެކޮޅުވެރި ސިޔާސަތުތައް ނިމުމަކަށް އައިސް، އޯބަން ހިފަހައްޓަވާފައިވާ ޔޫކްރެއިންގެ 105 ބިލިއަން ޑޮލަރު (90 ބިލިއަން ޔޫރޯ) ގެ ލޯނު އެހީ ދޫކުރުމަށްވެސް މަގުފަހިވެގެންދާނެ ކަމަށް ވަނީ ބެލެވިފައެވެ.
ކޮމެންޓު ފޮނުވާ