ޔަމަނުގެ ހޫތީ ޖަމާއަތުން އިސްރާއީލާ ދެކޮޅަށް ރަސްމީކޮށް ހަނގުރާމަ އިއުލާންކޮށް، ބެލިސްޓިކް މިސައިލްގެ ވަރުގަދަ ހަމަލާތަކެއް ދީފިއެވެ. މިއާއެކު މެދުއިރުމަތީގެ މަސްރަހު އިތުރަށް ގޯސްވެ، ދުނިޔޭގެ އިގްތިސާދަށް ވަނީ ބޮޑު ނުރައްކާއަކާ ކުރިމަތިވެފައެވެ.
ހޫތީންގެ ތަރުޖަމާނު ހާމަކުރެއްވި ގޮތުގައި މި ހަމަލާތަކަކީ އިސްރާއީލުން އީރާނަށް ދެމުންދާ ލާއިންސާނީ ހަމަލާތަކަށް މަހެއް ފުރުމާ ގުޅިގެން، އީރާނަށް ތާއީދުކުރުމުގެ ގޮތުން ދިން ހަމަލާތަކެކެވެ. އަދި އިސްރާއީލުގެ އަމަލުތައް ހުއްޓާނުލާހާ ހިނދަކު، ޑްރޯނާއި މިސައިލް ބޭނުންކޮށްގެން ދޭ ހަމަލާތައް ކުރިއަށް ގެންދާނެކަމުގެ އިންޒާރު އެ ޖަމާއަތުން ވަނީ ދީފައެވެ. މިކަމުގެ ސަބަބުން މުޅި ސަރަހައްދަށް ހަނގުރާމަ ފުޅާވެދާނެކަމުގެ ބިރު ވަނީ އިންތިހާއަށް ބޮޑުވެފައެވެ.
މި ހަމަނުޖެހުންތަކާއެކު މުޅި ދުނިޔޭގެ ކަންބޮޑުވުން އެންމެ ބޮޑަށް އަމާޒުވެފައިވަނީ ޔަމަނާއި ޖިބޫތީއާ ދެމެދު އޮންނަ ބާބު އަލްމަންދަބް ކަނޑުއޮޅިއަށެވެ. އެންމެ 18 މޭލުގެ ފުޅާމިން ހުންނަ މި ހަނި ކަނޑުއޮޅިއަކީ ޔޫރަޕާއި އޭޝިއާ ގުޅުވައިދޭ ސުއޭޒް ކެނަލްއަށް ދަތުރުކުރާ އުޅަނދުތައް ކޮންމެހެންވެސް ހުރަސްކުރަންޖެހޭ މައި ދޮރާއްޓެވެ. ހޫތީންގެ ކޮންޓްރޯލް އޮންނަ ސަރަހައްދާ ގާތުގައި އޮންނަ މި މަގަށް ނުރައްކާވުމަކީ ދުނިޔޭގެ ހަކަތައިގެ ސަޕްލައިއަށް އެޅޭނެ ވަރަށް ބޮޑު ހުރަހެކެވެ.
އިގްތިސާދީ ތަޖުރިބާކާރުން ލަފާކުރާ ގޮތުގައި، މި މަސްރަހުގެ ސަބަބުން ބާބު އަލްމަންދަބް ކަނޑުއޮޅިން ދަތުރުކުރުން ހުއްޓިއްޖެނަމަ ނުވަތަ ބަންދުކުރަން ޖެހިއްޖެނަމަ، ދުނިޔޭގެ ބާޒާރުން ދުވާލަކު ގާތްގަނޑަކަށް 6 މިލިއަން ފީފާގެ ތެޔޮ މަދުވާނެއެވެ. އޭގެ ނަތީޖާއެއްގެ ގޮތުން ދުނިޔޭގެ ބާޒާރުގައި ތެލުގެ އަގު އިންތިހާއަށް އުފުލި، ބައިނަލްއަގުވާމީ ވިޔަފާރީގެ ނިޒާމަށާއި ސަޕްލައި ޗެއިންތަކަށް އިއާދަނުކުރެވޭވަރުގެ ބޮޑެތި ގެއްލުންތަކެއް ލިބިގެންދާނެއެވެ.
ކޮމެންޓު ފޮނުވާ