މިމަހުގެ 3 ވަނަ ދުވަހު ވެލާނާ އިންޓަނޭޝަނަލް އެއާޕޯޓުން 6 ކިލޯއަށްވުރެ ގިނަ މަސްތުވާތަކެތި ރާއްޖެ އެތެރެކުރަން އުޅުނު ދިވެއްސަކާއި އިންޑިއާގެ ދެ މީހަކު ހައްޔަރުކޮށްފިއެވެ.
މަސްތުވާތަކެތި އެތެރެކޮށް، އޭގެ ވިޔަފާރިކުރާކަމުގެ ތުހުމަތުގައި ކަސްޓަމްސްއިން ހިފަހައްޓައި ފުލުހުންނާ ހަވާލުކޮށްފައިވަނީ ގދ. ގައްދޫ ހިތިލާގެ، ޢަލީ ޢިރުފާނު (28އ) އާއި އިންޑިއާއަށް ނިސްބަތްވާ ދަނޫޝްކާނދަން ގޯޕާލް (19އ) އަދި ކަތިރިވިލް މަނިމަރަން (21އ) އެވެ. މި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ދިވެހި މީހާ (ޢަލީ ޢިރުފާނު) ޝަރީއަތް ނިމެންދެން ބަންދުގައި ބެހެއްޓުމަށް ވަނީ އަމުރުކޮށްފައެވެ. އަދި އިންޑިއާއަށް ނިސްބަތްވާ ދެ މީހުން ވަނީ ފަސް ދުވަހުގެ މުއްދަތަކަށް ބަންދުކުރުމަށް ކޯޓުން ނިންމާފައެވެ.
ފުލުހުން މަޢުލޫމާތު ދީފައިވާ ގޮތުގައި މި މީހުން އަތުލައިގަނެވުނީ ރާއްޖެ އައި ވަގުތު އެމީހުންނާމެދު ޝައްކު އުފެދިގެން ކަސްޓަމްސްއިން އެމީހުންގެ ލަގެޖު ބަލައި ފާސްކުރުމުގެ ތެރޭގައެވެ. އެގޮތުން ލަގެޖުގެ ތެރެއިން ޑްރަގު އަޅާފައިހުރި ފުޅިތަކެއް ފެނިފައިވާއިރު، އެ ތަކެތި ތަހުލީލުކުރިއިރު ވަނީ ހަޝިޝް އޮއިލްއަށް ޕޮޒިޓިވްވެފައެވެ. އަތުލައިގަނެވުނު މަސްތުވާތަކެތީގެ ވަގުތީ ބަރުދަނުގައި 6.7 ކިލޯ ހުރިކަމަށް ފުލުހުން ބުނެފައިވާއިރު، ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.
ކޮމެންޓު ފޮނުވާ