ސަޢޫދީ ޢަރަބިއްޔާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު، ހިޒް އެކްސަލަންސީ ޔަޙްޔާ ޙަސަން އަލްޤަޙްޠާނީ ދެއްވި ޚާއްސަ ރޯދަވީއްލުމެއްގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުއާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު ބައިވެރިވެވަޑައިގެންފިއެވެ.
ހޮޓެލް ޖެންގައި އިއްޔެ ކުރިއަށްދިޔަ މި ރޯދަވީއްލުމުގައި ރައީސްގެ ދެކަނބަލުންގެ އިތުރުން ދައުލަތުގެ އިސްވެރިންނާއި، ރާއްޖޭގައި ތިއްބަވާ ބޭރު ގައުމުތަކުގެ ސަފީރުންނާއި ޑިޕްލޮމެޓިކް މިޝަންތަކުގެ އިސް މަންދޫބުން ބައިވެރިވެވަޑައިގެންނެވިއެވެ. ސައުދީ ސަފީރުގެ ދަޢުވަތަކަށް ރައީސްގެ ދެކަނބަލުން މިއަދު ވަޑައިގެންނެވިއިރު، ނިމިދިޔަ ހަފްތާގައި ރައީސުލްޖުމްހޫރިއްޔާގެ ދެކަނބަލުން އިސްނަގައިގެން ވަނީ ރާއްޖޭގައި ތިއްބަވާ ބޭރުގެ ޑިޕްލޮމެޓުންނާއި ބައިނަލްއަޤްވާމީ ޖަމިއްޔާތަކުގެ ވެރިންނަށް ރޯދަވީއްލުމެއް ދެއްވާފައެވެ.
ރަމަޟާން މަހުގެ ތެރޭގައި ބާއްވާ މިފަދަ ރޯދަވީއްލުންތަކަކީ ޑިޕްލޮމެޓިކް ދާއިރާގައި މަސައްކަތްކުރައްވާ ބޭފުޅުންގެ މެދުގައި ގުޅުން ބަދަހިކޮށް، ދޭދޭ ގުޅުންތައް އިތުރަށް ހަރުދަނާކުރުމަށް ސަގާފީ އަދި ދީނީ ހަމަތަކުގެ ތެރެއިން ލިބިގެންދާ މުހިންމު ފުރުސަތެކެވެ.
ކޮމެންޓު ފޮނުވާ