ވޯލްޑް ކަޕްގެ ތާރީޚުގައި މެކްސިކޯގެ އެސްޓާޑިއޯ އަޒްޓެކާ ސްޓޭޑިއަމްގައި އެ ގައުމު ބަލިނުވެ އޮތް އޮތުން ނިމުމަކަށް ގެނެސް، 3-2 އިން މެކްސިކޯ ބަލިކޮށް އިންގްލެންޑް މުބާރާތުގެ ކުއާޓާ ފައިނަލަށް ދަތުރުކޮށްފިއެވެ.
އާދީއްތަ ދުވަހުގެ ރޭ ކުޅުނު މި ފޯރިގަދަ މެޗުން މޮޅުވެ، ކުއާޓާ ފައިނަލްގައި އިންގްލެންޑް ނުކުންނާނީ ނޯވޭއާ ދެކޮޅަށެވެ. މެޗުގެ 36 ވަނަ މިނެޓުގައި ޖޫޑް ބެލިންހަމް ބޮލުން ޖެހި ލަނޑުން އިންގްލެންޑް ލީޑު ނެގިއިރު، އޭގެ 98 ސިކުންތު ފަހުން އޭނާ ވަނީ އިތުރު ލަނޑެއް ޖަހައި ލީޑު ފުޅާކޮށްފައެވެ. ނަމަވެސް ފުރަތަމަ ހާފު ނިމުމުގެ ކުރިން 42 ވަނަ މިނެޓުގައި ހޫލިއަން ކީނިއޯނޭސް ވަނީ މެކްސިކޯއަށް ލަނޑެއް ޖަހައިދީ ފަރަގު ކުޑަކޮށްފައެވެ.
ދެވަނަ ހާފުގެ 54 ވަނަ މިނެޓުގައި އިންގްލެންޑްގެ ޖަރެލް ކުއާންސާއަށް ރަތް ކާޑު ދެއްކުމުން އެޓީމުން ބާކީ ވަގުތު ކުޅުނީ ދިހަ ކުޅުންތެރިންނާއެކުގައެވެ. އެހެން ނަމަވެސް، މެކްސިކޯގެ ކީޕަރު ކުރި ފައުލަކާ ގުޅިގެން ލިބުނު ޕެނަލްޓީއަކުން ކެޕްޓަން ހެރީ ކޭން ވަނީ އިންގްލެންޑްގެ ތިންވަނަ ލަނޑު ކާމިޔާބުކޮށްފައެވެ. މިއީ ވޯލްޑް ކަޕްގެ ތާރީޚުގައި ކޭން ޖެހި 14 ވަނަ ލަނޑެވެ. މެޗުގެ ފަހުކޮޅު ކޭން އަތުން ވީ ފައުލަކަށް ލިބުނު ޕެނަލްޓީއަކުން ރައުލް ހިމެނޭޒް މެކްސިކޯގެ ދެވަނަ ލަނޑު ޖެހި ނަމަވެސް، އިންގްލެންޑުން ވަނީ މޮޅު ޑިފެންސެއްކޮށް ލީޑު ހިފަހައްޓާފައެވެ.
މެޗުގެ ކުރީރޭ މެކްސިކޯގެ ސަޕޯޓަރުން ވަނީ އިންގްލެންޑް ޓީމު ތިބި ހޮޓާ ކައިރިއަށް އެއްވެ، ދުންމާރިފުމެ، ފަޓާސް ޖަހައި ކުޅުންތެރިންނަށް އުނދަގޫކޮށްފައެވެ. ނަމަވެސް މި މެޗުން ބަލިވުމާއެކު، 1986 ގެ ފަހުން ކުއާޓާ ފައިނަލަށް ނުދެވި، މެކްސިކޯއަށް ވަނީ އަމިއްލަ ގައުމުގައި ކުޅެމުންދިޔަ މުބާރާތާ އަލްވަދާއު ކިޔަން ޖެހިފައެވެ.
ކޮމެންޓު ފޮނުވާ