ކުރިއަށް އޮތް ލޯކަލް ކައުންސިލް އިންތިހާބުގައި އައްޑޫ ސިޓީ ކައުންސިލްގެ މެޖޯރިޓީ ސަރުކާރު ހިންގާ ޕީއެންސީއަށް ދީފިނަމަ، ތަރައްގީގެ ތަފާތު ފެނިގެންދާނެ ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެއެވެ.
ޕީއެންސީގެ އައްޑޫ ސިޓީ މާލޭ ޖަގަހަ ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރު ޝިޔާމް ވަނީ އެމްޑީޕީއަށް ވަރަށް ބޮޑަށް ފާޑުވިދާޅުވެފައެވެ. އޭނާ ވިދާޅުވީ ފާއިތުވި ދިގު މުއްދަތެއްގައި އައްޑޫ ކައުންސިލްގެ މެޖޯރިޓީ އެމްޑީޕީން ކޮންޓްރޯލް ކުރި ނަމަވެސް، ރައްޔިތުންނަށް ފައިދާހުރި ކަމެއް ކޮށްދެވިފައިނުވާ ކަމަށާއި އެކަމަށް އައްޑޫގެ ރައްޔިތުން ހެކިވާނެ ކަމަށެވެ. އަދި އެމްޑީޕީގެ ވެރިކަމުގައި ސަރުކާރާއި މަޖިލީހުގެ މެޖޯރިޓީ އޮވެމެ، އައްޑޫގެ ކަރަންޓާއި މަގުތަކުގެ މައްސަލަ ހައްލުނުކޮށް، ދައުރު ނިމެން ކައިރިވުމުން އެ ވާހަކަ ދައްކަވާތީ ހައިރާންވެވަޑައިގަންނަވާ ކަމަށްވެސް ޝިޔާމް ވިދާޅުވިއެވެ.
މިނިސްޓަރު ވަނީ ނިމިދިޔަ ރައްޔިތުންގެ މަޖިލީހުގެ އިންތިހާބުގައި އައްޑޫ ރައްޔިތުން ސަރުކާރަށް އިތުބާރުކުރެއްވި ފަދައިން، ކައުންސިލް އިންތިހާބުގައިވެސް ރައީސް ޑރ. މުހައްމަދު މުއިއްޒަށް މެޖޯރިޓީ ދެއްވުމަށް އެދިވަޑައިގެންފައެވެ. ރައީސް މުއިއްޒުގެ ތަރައްގީގެ ތަސައްވުރުގައި އައްޑޫއަށް ޚާއްސަ އިސްކަމެއް ދީފައިވާކަން ފާހަގަކުރައްވައި ޝިޔާމް ވިދާޅުވީ، ކުރީ ސަރުކާރުން "ވައްގަނޑު ހުސްކޮށްލާފައި" ދިޔަ ނަމަވެސް، ރައީސް މުއިއްޒު ގެންދަވަނީ މާލީ އިންތިޒާމުތައް ހަމަޖައްސަވައި ވައުދުތައް ފުއްދެވުމަށް މަސައްކަތް ކުރައްވަމުން ކަމަށެވެ.
ކައުންސިލް އިންތިހާބުގެ ކެމްޕެއިން ފޯރީގައި ކުރިއަށްދާއިރު، މި އިންތިހާބު ބޭއްވުމަށް ހަމަޖެހިފައިވަނީ އަންނަ އެޕްރީލް މަހުގެ 4 ވަނަ ދުވަހުއެވެ.
ކޮމެންޓު ފޮނުވާ