ރާއްޖޭގެ ސިއްހީ ނިޒާމު ހަރުދަނާކުރުމަށް ސަރުކާރުން ކުރަމުންދާ މަސައްކަތުގެ ތެރެއިން، މި ހިނގާ މަހުގެ ތެރޭގައި އިތުރު 31 ރަށަކަށް އެމްބިއުލާންސް ފޮނުވަން ހަމަޖެހިފައިވާ ކަމަށް ހެލްތު މިނިސްޓަރު ޢަބްދުﷲ ނާޒިމް މިއަދު ވިދާޅުވެއްޖެއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން މިނިސްޓަރު ވިދާޅުވީ، އަތޮޅު ތެރޭގެ ހޮސްޕިޓަލްތަކާއި ސިއްހީ މަރުކަޒުތަކަށް ބޭނުންވާ ވަސީލަތްތައް ފޯރުކޮށްދިނުމަކީ ސަރުކާރުން ޚާއްސަ އިސްކަމެއް ދީގެން ކުރަމުން އަންނަ ކަމެއް ކަމަށެވެ. މިގޮތުން ނިމިދިޔަ މަހުވެސް 56 ރަށަކަށް އެމްބިއުލާންސް ފޮނުވާފައިވާކަން އެމަނިކުފާނު ފާހަގަކުރެއްވިއެވެ.
މި މަހުގެ ތެރޭގައި އެމްބިއުލާންސް ފޮނުވުމުގެ މަސައްކަތް ކުރިއަށް ގެންދިއުމަށް ރާވާފައިވަނީ ދެ ބުރަކަށް ބަހާލައިގެންނެވެ. އެގޮތުން އަންނަ ހަފުތާގެ ތެރޭގައި 14 ރަށަކަށް އަދި މަހުގެ ފަހުކޮޅު ބާކީ 17 ރަށަށް އެމްބިއުލާންސް ފޮނުވުމުގެ އިންތިޒާމު ހަމަޖެހިގެންދާނެ ކަމަށް މިނިސްޓަރު ވިދާޅުވިއެވެ.
މީގެ އިތުރުން، އާބާދީ ބޮޑެތި ސަރަހައްދުތަކަށް ޚާއްސަކޮށްގެން ގެންނަ ޕެރަމެޑިކް އެމްބިއުލާންސްތައް އަންނަ މަހު ލިބޭނެކަމުގެ އުފާވެރި ޚަބަރުވެސް މިނިސްޓަރު ދެއްވިއެވެ. އަދި އެމްބިއުލާންސްތަކަށް ދިމާވާ މައްސަލަތައް ލަސްނުކޮށް ހައްލުކުރުމަށްޓަކައި، މަރާމާތުގެ މަސައްކަތް ދިގު މުއްދަތަކަށް ބަޔަކާ ހަވާލުކުރުމުގެ މަސައްކަތްވެސް ކުރިއަށްދާކަން ނާޒިމް ފާހަގަކުރެއްވިއެވެ.
ކޮމެންޓު ފޮނުވާ