ދުނިޔޭގެ ބާޒާރުގައި ތެލުގެ އަގު އުފުލުމާ ގުޅިގެން، ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ވިއްކާ ތެލުގެ އަގުތަކަށް މިއަދުން ފެށިގެން ބޮޑެތި ބަދަލުތަކެއް ގެނެސްފިއެވެ.
އެސްޓީއޯގެ ސަބްސިޑިއަރީ ކުންފުނި، ފިއުލް ސަޕްލައި މޯލްޑިވްސް (އެފްއެސްއެމް) އިން އާންމުކުރި އާ އަގުތަކަށް ބަލާއިރު، ޕެޓްރޯލް ލީޓަރެއް ދެން ލިބޭނީ 16.01 ރުފިޔާއަށެވެ. މިއީ ކުރިން ޕެޓްރޯލް ލީޓަރެއް ވިއްކަމުން އައި 13.50 ރުފިޔާއާ އަޅާބަލާއިރު 2.51 ރުފިޔާގެ އިތުރުވުމެކެވެ. ހަމައެއާއެކު، ޑީސަލް ލީޓަރެއްގެ އަގު ވަނީ 13.92 ރުފިޔާއިން 17.54 ރުފިޔާއަށް މަތިވެފައެވެ. މިއީ ލީޓަރަކުން 3.62 ރުފިޔާގެ ބޮޑުވުމެކެވެ.
ތެލުގެ އަގަށް މިފަދަ ކުއްލި އަދި ބޮޑު ބަދަލެއް ގެންނަން ޖެހުނީ މެދުއިރުމަތީގެ މަސްރަހު ހަލަބޮލިވެ، އެމެރިކާއާއި އިސްރާއީލް ގުޅިގެން އީރާނަށް ދެމުންދާ ހަމަލާތަކުގެ ސަބަބުން ކަމަށް އެސްޓީއޯއިން ހާމަކުރެއެވެ. ޚާއްސަކޮށް މި ހަމަނުޖެހުންތަކާ ގުޅިގެން، ދުނިޔޭގެ ތެލުގެ ވިޔަފާރީގެ މައި ނާރެސް ކަމުގައިވާ އީރާންގެ ހޮރްމޫޒް ކަނޑުއޮޅި ބަންދުކުރުމަކީ އަގުތައް އުފުލެން މެދުވެރިވި މައިގަނޑު ސަބަބު ކަމުގައި އެ ކުންފުނިން ފާހަގަކުރެއެވެ.
ދުނިޔޭގެ ބާޒާރުގައި ހިނގާ ކަންކަމާ ގުޅިގެން އެސްޓީއޯއިން އަބަދުވެސް ތެލުގެ އަގަށް ހެޔޮ ބަދަލާއި ނުރަނގަޅު ބަދަލުތައް ގެނައި ކަމުގައި ވިޔަސް، މިއަދު ގެނައި ބަދަލަކީ ފަހުގެ ތާރީޚެއްގައި ރާއްޖޭގައި ތެލުގެ އަގަށް އައި އެންމެ ބޮޑު އެއް ބަދަލުކަން ފާހަގަކޮށްލެވެއެވެ.
ކޮމެންޓު ފޮނުވާ