ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން ކުރިއަށްގެންދާ 'އާއިލީ ބޯހިޔާވަހިކަން' ޕްރޮގްރާމުގެ ޚާއްސަ ކެޓަގަރީތަކަށް ކުރިމަތިލުމުގެ ޝަރުތުތަކަށް މުހިންމު ބަދަލުތަކެއް ގެނެސް، އެކަން ހައުސިންގ މިނިސްޓްރީން މިއަދު ހާމަކޮށްފިއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ހިންގާ ބޯހިޔާވަހިކަމުގެ މި ބިޔަ މަޝްރޫއުގެ ދަށުން ޖުމްލަ 7،900 ފްލެޓާއި 15،000 ގޯތި ދޫކުރުމަށް ވަނީ ހަމަޖެހިފައެވެ. މިދިޔަ ޖަނަވަރީ މަހުގެ 18 ވަނަ ދުވަހު ހުޅުވާލި މި ފުރުސަތުގައި، ދޫކުރާ ފްލެޓްތަކުގެ ތެރެއިން 4،000 ފްލެޓް މާލޭގެ ރަށްވެހިންނަށް އަދި 1،500 ފްލެޓް މާލޭގައި ދިރިއުޅޭ ރަށްވެހިވެފައިނުވާ ފަރާތްތަކަށް ވަނީ ކަނޑައަޅާފައެވެ. ބާކީ ހުރި 2،400 ފްލެޓް ޚާއްސަކޮށްފައިވަނީ ސަރުކާރުން ކަނޑައަޅާ ވަކި ޚާއްސަ ކެޓަގަރީތަކަށެވެ.
މިނިސްޓްރީން މިއަދު ގެނައި އިސްލާހުގައިވާ ގޮތުން، ޚާއްސަ ކެޓަގަރީތަކަށް ކަނޑައަޅާފައިވާ ފްލެޓްތަކުގެ ތެރެއިން 1،000 ފްލެޓް ބަހާލެވިފައިވާ ގޮތް ވަނީ ތަފްސީލުކޮށްދީފައެވެ. އެގޮތުން ސިވިލް ސަރވިސްގެ މުވައްޒަފުންނަށް 200 ފްލެޓް، ޝަރުއީ ދާއިރާ، ފުލުހުން، އެމްއެންޑީއެފް އަދި ކަރެކްޝަނަލް ސަރވިސަސްއިން ކުރެ ކޮންމެ މުއައްސަސާއަކަށް 100 ފްލެޓް އަދި ދައުލަތުގެ އެހެނިހެން އިދާރާތަކަށް 400 ފްލެޓް ވަނީ ކަނޑައަޅާފައެވެ. "އެހެނިހެން އިދާރާތައް" ކަމުގައި ބަޔާންކޮށްފައިވަނީ ރައީސް އޮފީހާއި، ރައްޔިތުންގެ މަޖިލީހާއި، އޭޖީ އޮފީހާއި، މިނިވަން މުއައްސަސާތަކުގެ އިތުރުން މުލިއާގެ އާއި ހިލާލީގޭގެ މުވައްޒަފުންނެވެ.
މި ކެޓަގަރީތަކަށް ކުރިމަތިލާ މުވައްޒަފުންގެ ޝަރުތުތަކަށް ގެނައި ބަދަލުތަކުގެ ތެރޭގައި މައިގަނޑު ތިން ކަމެއް ހިމެނެއެވެ. އެއީ އެ މީހަކީ މާލެ ސިޓީގައި އާއިލާ ބިނާކޮށްފައިވާ މީހަކަށް ވުމާއި، އެ އިދާރާއެއްގައި މެދުނުކެނޑި މަދުވެގެން އެއް އަހަރު ޚިދުމަތްކޮށްފައިވުމުގެ އިތުރުން، ފްލެޓް ލިބުމަށްފަހު ވެސް އެ އިދާރާއިން ކަނޑައަޅާ ގޮތެއްގެ މަތިން ވަޒީފާގައި ދެމިހުރުމަށް އެއްބަސްވުމެވެ.
މި އިސްލާހުތަކާ އެކު، ގޯއްޗާއި ފްލެޓަށް އެދި ހުށަހެޅުމުގެ މުއްދަތު ވެސް ސަރުކާރުން ވަނީ އިތުރުކޮށްދީފައެވެ. އެގޮތުން ކުރިން ކަނޑައަޅާފައިވާ މުއްދަތު ހަމަވުމުގެ ބަދަލުގައި، އަންނަ އޭޕްރީލް މަހުގެ 30 ވާ ބުރާސްފަތި ދުވަހުގެ ރޭގަނޑު 23:59 އާ ހަމައަށް ފޯމު ހުށަހެޅުމުގެ ފުރުސަތު މިހާރު ވަނީ ހުޅުވާލާފައެވެ.
ކޮމެންޓު ފޮނުވާ