އިންޑިއާގެ މަނިޕާލް ހޮސްޕިޓަލުން ދެމުން އައި ޚިދުމަތްތަކުގެ އަގުބޮޑުވުމާ ގުޅިގެން މެދުކަނޑާލާފައި އޮތް އާސަންދައިގެ ޚިދުމަތް، އަގުތަކަށް ހެޔޮ ބަދަލުތަކެއް ގެނައުމަށްފަހު އަލުން ފަށައިފިއެވެ. މިކަން ހާމަކުރައްވައި އާސަންދަ ކުންފުނީގެ މެނޭޖިންގ ޑިރެކްޓަރ އާމިނަތު ޒީނިޔާ ވިދާޅުވީ، މަނިޕާލް ހޮސްޕިޓަލާއެކު އަލުން އެއްބަސްވުމެއް ހަދާފައިވާ ކަމަށާއި، މި އައު އެއްބަސްވުމުގެ ދަށުން، ކަނޑައެޅިފައިވާ ޚިދުމަތްތައް އާސަންދައިގެ ދަށުން ދެން ލިބެމުންދާނެ ކަމަށެވެ.
މަނިޕާލް ހޮސްޕިޓަލަށް އަލަށް ބަލިމީހުން ފޮނުވުން އާސަންދައިން ހުއްޓާލީ 2024 ވަނަ އަހަރުގެ ޖުލައި މަހުގެ ތެރޭގައެވެ. ނަމަވެސް އޭރު އެ ފިޔަވަޅު އެޅިއިރުވެސް، އެ ހޮސްޕިޓަލުގައި ފަރުވާ ހޯދަމުންދިޔަ މީހުންނަށް ދަތިނުވާނެހެން އެފަރާތްތަކުގެ އާސަންދަ މެދުކަނޑާނުލައި ކުރިއަށް ގެންގޮސްފައިވެއެވެ. އޭރު ޚިދުމަތް ހުއްޓާލަން ޖެހުނީ ހޮސްޕިޓަލުގެ އަގުތައް އިންތިހާއަށް ބޮޑުވުމުގެ ސަބަބުންނެވެ.
މިކަމާ ގުޅޭގޮތުން ކުރިން ވާހަކަދައްކަވަމުން އެންސްޕާގެ ސީއީއޯ ހީނާ ވަލީދު ވިދާޅުވެފައިވަނީ، ޚިދުމަތުގެ އަގު ބޮޑުވުމުގެ އިތުރުން، ފަރުވާގެ އެކި މަރުހަލާތަކުގައި ބަލިމީހުންގެ އަތުން އިތުރު ފައިސާ ނަގާކަމުގެ ޝަކުވާތައް ވެސް ލިބިފައިވާ ކަމަށެވެ. އަދި އެހެނިހެން ގޮތްގޮތުން ހޮސްޕިޓަލަށް ފައިސާ ދައްކަން މަޖުބޫރުވާ ހާލަތްތައް ދިމާވާކަން ފާހަގަކުރެވިފައިވާ ކަމަށް ވެސް އޭރު ހީނާ ވިދާޅުވެފައިވެއެވެ.
އާސަންދަ ސްކީމްގެ ދަށުން ދައުލަތުން އެންމެ ބޮޑު ހޭދައެއް ކުރަމުން އަންނަނީ އިންޑިއާގެ ހޮސްޕިޓަލްތަކަށެވެ. އެ ހޮސްޕިޓަލްތަކަށް ލިބޭ އާމްދަނީގައި ދިވެހި އާސަންދައިގެ ދައުރު ބޮޑުކަން ފާހަގަކުރެވެއެވެ. ސަރުކާރުން މިހާރު މަސައްކަތް ކުރަމުންދަނީ ހަމައެކަނި އިންޑިއާ އަދި ލަންކާއަށް ބަރޯސާވުމުގެ ބަދަލުގައި، ތައިލެންޑް (ބެންކޮކް) އަދި ޔޫއޭއީ ފަދަ ޤައުމުތަކަށް ވެސް އާސަންދައިގެ ޚިދުމަތް ފުޅާކޮށް، ދިވެހިންނަށް ފެންވަރު ރަނގަޅު ސިއްހީ ފަރުވާ ލިބޭނެ އިތުރު ގޮތްތައް ހޯދައިދިނުމަށެވެ.
ކޮމެންޓު ފޮނުވާ