އެކި މީހުންގެ އަތުން ކޭޝްކާޑު ކުއްޔަށް ނަގައިގެން، ސްކޭމްކޮށްގެން ހޯދާ ފައިސާ އޭޓީއެމް މެދުވެރިކޮށް ނަގަމުންދިޔަ ކަމުގެ ތުހުމަތުގައި ފުލުހުން މީހަކު ހައްޔަރުކޮށްފިއެވެ. މި މައްސަލައިގައި ހައްޔަރުކޮށްފައިވަނީ ގއ. ގެމަނަފުށީ، ރަންކޮކާގޭ، އުމުރުން 36 އަހަރުގެ ނަދީފް މުހައްމަދު އެވެ.
ފުލުހުން ހާމަކޮށްފައިވާ ގޮތުގައި، މީނާ ވަނީ މިދިޔަ އަހަރުގެ ސެޕްޓެމްބަރު މަހުގެ ތެރޭގައި ވިޔަފާރިވެރިޔަކަށް ގުޅައި، ކަސްޓަމަރެއް ކަމަށް ހެދިގެން އޭނާގެ އޯޓީޕީ ހޯދުމަށްފަހު އެކައުންޓުން ގިނަ އަދަދެއްގެ ފައިސާ ވަގަށް ނަގާފައެވެ. ފުލުހުންގެ އެންޓި ސްކޭމް ސެންޓަރުގެ ތަޙުޤީޤުން އެނގިފައިވާ ގޮތުގައި، އެ ވިޔަފާރިވެރިޔާގެ އެކައުންޓުން 29،600 އަށްވުރެ ގިނަ ރުފިޔާ އެހެން މީހެއްގެ އެކައުންޓަށް ޖަމާކޮށް، އޭގެ ތެރެއިން 24،700 ރުފިޔާ ނަދީފް ވަނީ އޭޓީއެމް މެދުވެރިކޮށް ނަގާފައެވެ. އަދި މީގެ އިތުރުން 4،900 އަށްވުރެ ގިނަ ރުފިޔާ އެހެން އެކައުންޓަކަށް ޖަމާކޮށް، އެ ފައިސާވެސް އޭޓީއެމް މެދުވެރިކޮށް ނަގާފައިވާކަން ވަނީ ހާމަވެފައެވެ.
ތަޙުޤީޤަށް ފާހަގަކުރެވިފައިވާ ގޮތުގައި ނަދީފްއަކީ އެކި މީހުންގެ އަތުން ކޭޝްކާޑު ކުއްޔަށް ހޯދައިގެން، ސްކޭމް ފައިސާ ނަގައިދިނުމުގައި ހަރަކާތްތެރިވާ މީހެކެވެ. ކޯޓު އަމުރެއްގެ ދަށުން މިދިޔަ މަހުގެ 29 ވަނަ ދުވަހު އޭނާ ހައްޔަރުކޮށްފައިވާއިރު، ބަންދުގެ މުއްދަތު ހަމަވުމުން ކޯޓަށް ހާޒިރުކުރުމުން އިތުރު 7 ދުވަހުގެ މުއްދަތެއް ކޯޓުން ވަނީ ދީފައެވެ.
ކޮމެންޓު ފޮނުވާ