މަތީ ތައުލީމު ހާސިލުކުރާ ދަރިވަރުންނަށް ދޫކުރާ ލޯނު ސްކީމުގެ ދަށުން، 2024 އަދި 2025 ވަނަ އަހަރު ޖުމްލަ 1.24 ބިލިއަން ރުފިޔާ ދޫކޮށްފައިވާ ކަމަށް ހަޔާ އެޑިއުކޭޝަން މިނިސްޓްރީގެ ތަފާސްހިސާބުތަކުން ދައްކައިފި އެވެ. އޭގެ ތެރެއިން 548.16 މިލިއަން ރުފިޔާ ދޫކޮށްފައިވަނީ ނިމިދިޔަ އަހަރު އެވެ.
މިނިސްޓްރީން ހާމަކުރި ގޮތުގައި މިހާތަނަށް 1،438 ދަރިވަރަކަށް ލޯނު ދޫކޮށްފައިވާއިރު، އޭގެ ތެރޭގައި ގިނައީ އަންހެން ދަރިވަރުންނެވެ. އެއީ 749 އަންހެން ދަރިވަރުންނާއި 568 ފިރިހެން ދަރިވަރުންނެވެ. އަދި މި ލޯނުގެ އެހީގައި ކިޔެވި 1،211 ދަރިވަރަކު މިހާރު ދަސްވެނިވެފައިވާ ކަމަށް ވެސް އެ ވުޒާރާއިން ބުނެފައިވެ އެވެ.
ލޯނުގެ އިތުރުން ސަރުކާރުގެ ހިލޭ ޑިގްރީ ސްކީމަށް ވެސް ބޮޑު ހޭދައެއް ކޮށްފައިވެ އެވެ. އެގޮތުން ފުރަތަމަ ޑިގްރީ ސްކީމަށް 301.1 މިލިއަން ރުފިޔާ ދޫކޮށްފައިވާއިރު، މިވަގުތު ވެސް 8،680 ދަރިވަރުން އަންނަނީ އެ ސްކީމުގެ ދަށުން ކިޔަވަމުންނެވެ.
މީގެއިތުރުން، ސްކޮލަޝިޕްތަކަށް 2024 އާއި 2025 ވަނަ އަހަރު 471 މިލިއަން ރުފިޔާ ދޫކޮށްފައިވާ ކަމަށާއި، ރާއްޖެ އާއި ރާއްޖެއިން ބޭރުގެ 20 ގައުމެއްގައި ދަރިވަރުން މަތީ ތައުލީމު ހާސިލުކުރަމުންދާ ކަމަށް ހަޔާ އެޑިއުކޭޝަން މިނިސްޓްރީން ވަނީ ފާހަގަކޮށްފަ އެވެ.
ކޮމެންޓު ފޮނުވާ