ރާއްޖެއަށް މަސްތުވާތަކެތި އެތެރެކޮށް އެތަކެތީގެ ވިޔަފާރިކުރުމާއި، އެކަމުން ހޯދާ ފައިސާ ލޯންޑާކުރާ ނެޓްވޯކްތައް ހުއްޓުވުމަށް ފުލުހުން ފަށާފައިވާ "އޮޕަރޭޝަން އަލިމަގު" ގެ ދަށުން މާލެ ސަރަހައްދާއި ގއ. އަތޮޅުގައި ހިންގި ޚާއްސަ ހަރަކާތެއްގައި ހަތަރު މީހަކު ހައްޔަރުކޮށްފިއެވެ.
ފުލުހުން މައުލޫމާތު ދީފައިވާ ގޮތުގައި، މިއަދު ކުރިއަށް ގެންދިޔަ މި އޮޕަރޭޝަންގައި މިހާތަނަށް ޖުމުލަ 10 ތަނެއް ވަނީ ބަލައި ފާސްކޮށްފައެވެ. މި ތަންތަން ބަލައި ފާސްކުރުމުގެ ތެރޭގައި ހަތަރު މީހަކު ފުލުހުންގެ ބެލުމުގެ ދަށަށް ގެންގޮސްފައިވީ ނަމަވެސް، ހައްޔަރުކުރެވުނު މީހުންގެ ވަނަވަރު ނުވަތަ އެހެން އެއްވެސް ޒާތީ މައުލޫމާތެއް ފުލުހުން އަދި ހާމަކޮށްފައެއް ނުވެއެވެ.
މި އޮޕަރޭޝަނަކީ ޚާއްސަކޮށް ގއ. އަތޮޅުގައި ފުޅާ ދާއިރާއެއްގައި މަސްތުވާތަކެތީގެ ވިޔަފާރިކޮށް، މަނީ ލޯންޑަރިންގެ ޢަމަލުތައް ހިންގާ ކަމަށް ތުހުމަތު ކުރެވޭ ފަރާތްތަކަށް އަމާޒުކޮށްގެން ހިންގާ އޮޕަރޭޝަނެއް ކަމަށް ފުލުހުން ވަނީ ބުނެފައެވެ. މި މަސައްކަތުގެ ތެރެއިން ކުށުގެ ތުހުމަތު ކުރެވޭ މީހުންނާ ގުޅުންހުރި ތަންތަން ބަލައި ފާސްކުރުމާއި، ޤާނޫނު ތަންފީޒު ކުރުމުގެ ގޮތުން އަޅަންޖެހޭ ފިޔަވަޅުތައް އެޅުމުގެ އަމަލީ މަސައްކަތްތައް ކުރިއަށްދާނެ ކަމަށްވެސް ފުލުހުން ހާމަކުރެއެވެ.
ސައުތު ޕޮލިސްގެ ޚާއްސަ ޓީމުތަކާއި، ޕޮލިސް އިންޓެލިޖެންސް އަދި ޑްރަގް އެންފޯސްމަންޓް ވިންގު ގުޅިގެން ކުރިއަށް ގެންދާ މި އޮޕަރޭޝަންގައި ހައްޔަރުކުރި މީހުންނާ ގުޅޭ އިތުރު ތަފްސީލު ތަހުގީގު ކުރިއަށްދާ ވަރަކުން ހާމަކުރަމުން ގެންދާނެ ކަމަށް ބެލެވެއެވެ.
ކޮމެންޓު ފޮނުވާ