މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން އާންމުކޮށްފައިވާ އެންމެ ފަހުގެ ތަފާސްހިސާބުތަކުން ދައްކާގޮތުގައި، ރިސޯޓުތަކުގެ ކުލީގެ މުއްދަތު ނުވަތަ ލީޒް ޕީރިއަޑް އިތުރުކޮށްގެން ދައުލަތަށް ލިބުނު އާމްދަނީ ބޮޑުތަނުން އިތުރުވެ، މިދިޔަ އަހަރު އެކަނިވެސް 994 މިލިއަން ރުފިޔާ ލިބިފައިވެއެވެ. މިއީ އޭގެ ކުރީ އަހަރު މި ގިންތިން ލިބުނު 307 މިލިއަން ރުފިޔާއާ އަޅާބަލާއިރު ފާހަގަކޮށްލެވޭ ބޮޑު އިތުރުވުމެކެވެ.
މި އާމްދަނީ އިތުރުވުމުގެ މައިގަނޑު ސަބަބެއްކަމަށް ބެލެވެނީ، މިދިޔަ އަހަރުގެ މާޗް މަހު ޓޫރިޒަމާބެހޭ ގާނޫނަށް ގެނައި އިސްލާހާއެކު ރިސޯޓުތަކަށް ލިބުނު ލުއިތަކެވެ. އެ އިސްލާހުގެ ދަށުން، ގާނޫނަށް އަމަލުކުރަން ފަށާތާ ހަ މަސް ދުވަހުގެ ތެރޭގައި މުއްދަތު އިތުރުކުރުމަށް އެދި ފައިސާ ދައްކާ ފަރާތްތަކަށް ޚާއްސަ ގޮތްތަކެއް ވަނީ ކަނޑައަޅާފައެވެ. އެގޮތުން 50 އަހަރަށް ދޫކޮށްފައިވާ ތަނެއްގެ މުއްދަތު އިތުރު 49 އަހަރަށް އިތުރުކުރާނަމަ، އެ މުއްދަތުގެ ތެރޭގައި ދައްކަން ޖެހެނީ ފަސް މިލިއަން ޑޮލަރުގެ ފީއެކެވެ. އަދި 20 އަހަރަށް އިތުރުކުރާނަމަ 2.5 މިލިއަން ޑޮލަރު ދައްކަން ޖެހޭއިރު، 25 އަހަރަށް އިތުރުކުރާނަމަ ދައްކަން ޖެހެނީ 3 މިލިއަން ޑޮލަރެވެ.
ނަމަވެސް، މި ޚާއްސަ މުއްދަތު ފަހަނައަޅައި ދިއުމަށްފަހު ނުވަތަ ގާނޫނަށް އަމަލުކުރަން ފަށާތާ 6 މަސް ފަހުން، 49 އަހަރަށް މުއްދަތު އިތުރުކުރެވޭނީ 10 މިލިއަން ޑޮލަރުގެ ފީއެއް އެއްފަހަރާ ދައްކައިގެން ކަމަށް އެ އިސްލާހުގައި ބަޔާންކޮށްފައިވެއެވެ. މީގެ ކުރިން ގާނޫނު އޮތްގޮތުންނަމަ މުއްދަތު އިތުރުކުރާ ކޮންމެ އަހަރަކަށް އެއް ލައްކަ ޑޮލަރު ޖެހޭއިރު، ހަ މަސްދުވަހަށްވުރެ ދިގު މުއްދަތަކުން ފައިސާ ދައްކާނަމަ އަހަރަކަށް ޖެހޭނީ ދެ ލައްކަ ޑޮލަރެވެ.
ތަފާސްހިސާބުތައް ދައްކާގޮތުން ލީޒް މުއްދަތު އިތުރުކޮށްގެން ލިބުނު ފައިސާއަކީ މިދިޔަ އަހަރު ދައުލަތަށް ލިބުނު ޖުމްލަ އާމްދަނީގެ ތިން އިންސައްތައެވެ. މިދިޔަ އަހަރު ދައުލަތަށް ޖުމްލަ 26 ބިލިއަން ރުފިޔާ ލިބިފައިވާއިރު، އޭގެ ތެރޭގައި ޑޮލަރުން ލިބުނު އާމްދަނީގެ ގޮތުގައި 1.1 ބިލިއަން ހިމެނެއެވެ.
ކޮމެންޓު ފޮނުވާ