ވެލާނާ އިންޓަނޭޝަނަލް އެއާޕޯޓް (ވީއައިއޭ) ގެ ޓެކްސީ ކިއު އޮންނަ ސަރަހައްދުގައި ބިދޭސީންތަކެއްގެ މެދުގައި ހިނގި ހަމަނުޖެހުމަކާ ގުޅިގެން ފުލުހުންގެ ބެލުމުގެ ދަށަށް ގެންދިޔަ މީހުންނަށް ނަސޭހަތްތެރިވުމަށްފަހު ދޫކޮށްލައިފިއެވެ. މިދިޔަ ބުރާސްފަތި ދުވަހުގެ ރޭ ދަންވަރު 12:15 ހާއިރު ހިނގި މި ހާދިސާ ފުލުހުންނަށް ރިޕޯޓްކޮށްފައިވާއިރު، މީސްމީޑިއާގައި ދައުރުވަމުންދާ ވީޑިއޯއިން ފެންނަ ގޮތުގައި އެ ސަރަހައްދުގައި ހުރި މީހަކު ފުންމައިގެން ގޮސް އެހެން މީހެއްގެ ގައިގައި ފައިން ވަރަށް ބާރަށް ޖަހާ މަންޒަރު ފެނިގެންދެއެވެ. އަދި އެވަގުތު އެތަނުގައި ތިބި އެއާޕޯޓުގެ ސެކިއުރިޓީ އޮފިސަރުން އެކަން ހުއްޓުވުމަށް މަސައްކަތްކުރާ މަންޒަރުވެސް އެ ވީޑިއޯއިން ފެނެއެވެ.
ފުލުހުންގެ މީޑިއާ އޮފިޝަލް ވިދާޅުވި ގޮތުގައި، މި ހަމަނުޖެހުމާ ގުޅިގެން ތުހުމަތުކުރެވޭ ފަރާތްތައް ފުލުހުންގެ އިދާރާއަށް ހާޒިރުކޮށް މައުލޫމާތު ސާފުކޮށްފައިވެއެވެ. އަދި އެފަދަ ކަމެއް ތަކުރާރު ނުކުރުމަށް އެމީހުންނަށް ނަސޭހަތްދިނުމަށްފަހު ދޫކޮށްލާފައިވާ ކަމަށާއި، ނަމަވެސް މި މައްސަލައާ ގުޅިގެން އިތުރަށް ބަލަންޖެހޭ ކަންކަން ބަލަމުންދާ ކަމަށް އޮފިޝަލް ވިދާޅުވިއެވެ. މި މާރާމާރީ ހިންގި މީހުންނަކީ ކޮން ގައުމަކަށް ނިސްބަތްވާ ބައެއްކަން ނުވަތަ އެމީހުންގެ ވަނަވަރާ ގުޅޭ އެއްވެސް ތަފްސީލެއް ފުލުހުން އަދި ހާމަކޮށްފައެއް ނުވެއެވެ.
ކޮމެންޓު ފޮނުވާ