ކުދި އަދި މެދު ފަންތީގެ ވިޔަފާރިތައް ކުރިއެރުވުމަށް ކުރިއަށް އޮތް ދެ އަހަރު ބޮޑެތި ލުއިތަކެއް ދިނުމަށް ސަރުކާރުން ނިންމަވާފައިވާ ކަމަށާއި އެ ލުއިތަކުގެ ތެރެއިން ބައެއް ކަންކަން އަންނަ މަހުގެ ފުރަތަމަ ދުވަހުން ފެށިގެން ތަންފީޒުކުރަން ފަށާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
މި މަހުގެ 17 ވަނަ ދުވަހު ކުދި އަދި މެދު ފަންތީގެ ވިޔަފާރިވެރިންނާ ބައްދަލުކުރައްވައި އެމީހުންގެ ކަންބޮޑުވުންތަކާއި ގޮންޖެހުންތަކުގެ ވާހަކަތައް އަޑުއައްސަވާފައިވާ ރައީސް މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ވިޔަފާރިވެރިން ފާހަގަކުރެއްވި ކަންކަމާ ގުޅޭ ގޮތުން މިދިޔަ ބުދަ ދުވަހު ވަޒީރުންގެ މަޖިލީހުގައި މަޝްވަރާކޮށް، ކުރިއަށް އޮތް ދެ އަހަރު ކުދި ވިޔަފާރިތަކަށް ހާއްސަ ލުއިތަކެއް ދިނުމަށް ނިންމަވާފައިވާ ކަމަށެވެ. މި ކަމާ ގުޅޭ މައުލޫމާތު ސަރުކާރުގެ ކަމާބެހޭ ފަރާތްތަކުން އިއުލާން ކުރަމުން ދާނެ ކަމަށް ރައީސް ވިދާޅުވިއެވެ.
އިކޮނޮމިކް މިނިސްޓަރު މުހައްމަދު ސައީދު ވިދާޅުވީ، އަންނަ އަހަރު ކުދި ވިޔަފާރިތަކަށް ހާއްސަކޮށްގެން 500 މިލިޔަން ރުފިޔާގެ ލޯނު ދިނުމަށް ސަރުކާރުން ނިންމަވާފައިވާ ކަމަށާއި މިއީ ކުދި ވިޔަފާރިތަކަށް ލިބޭނެ ބޮޑު ހިތްހަމަޖެހުމަކަށް ވާނެ ކަމަށެވެ. ވީތުވެދިޔަ ދެ އަހަރުގެ ތެރޭގައި 595 ކުދި ވިޔަފާރިއަކަށް 349 މިލިޔަން ރުފިޔާގެ ކުދި ލޯން ދޫކޮށްފައިވާ ކަމަށާއި 13 ބިލިޔަން ރުފިޔާގެ ބިލްތަކަށް ފައިސާ ދައްކާފައިވާ ކަމަށް ސައީދު ފާހަގަކުރެއްވިއެވެ. އޭގެ ތެރެއިން 5 ބިލިޔަން ރުފިޔާއަކީ ކުދި އަދި މެދު ފަންތީގެ ވިޔަފާރިތަކުގެ ބިލްތަކަށް ދައްކާފައިވާ ފައިސާ ކަމަށް މިނިސްޓަރު ވިދާޅުވިއެވެ.
ކޮމެންޓު ފޮނުވާ