ރައްޔިތުންނަށް ބޭނުންވާ ގިނަ ބޭސްތަކެއް ނުލިބޭ މައްސަލަ ތަހުގީގުކުރުމަށް އާސަންދައާއި އެސްޓީއޯގެ އިސް ވެރިން ރައްޔިތުންގެ މަޖިލީހުގެ އިޖްތިމާއީ ކޮމިޓީއަށް ހާޒިރުކޮށްދިނުމަށް ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް މިއަދު އެދިވަޑައިގެންފިއެވެ.
މަޖިލީހުގެ ރައީސް އަބްދުއްރަހީމް އަބްދުﷲއަށް ފޮނުއްވި ސިޓީގައި މެންބަރު ކުޑޫ ވިދާޅުވީ މިދިޔަ އަހަރުން ފެށިގެން ޑޮކްޓަރުން ލިޔެދޭ ބޭސް އާސަންދައިގެ ދަށުން އަމިއްލަ ފާމަސީތަކުން ނުލިބޭ ކަމަށާއި އެސްޓީއޯއިން ގަންނަންވެސް އެ ބޭސްތައް ނުލިބޭ ކަމުގެ ޝަކުވާ އާއްމުންގެ ފަރާތުން ކެނޑިނޭޅި ލިބެމުންދާ ކަމަށެވެ. ހަކުރު ބައްޔާއި ކެންސަރު އަދި ލޭގެ ޕްރެޝަރު ފަދަ ބަލިތަކަށް ދާއިމީ ގޮތެއްގައި ބޭސް ކާން ޖެހޭ މީހުންނަށް މި ބޭސްތައް ލިބުން ކަށަވަރުވާން ޖެހޭ ކަމަށް އޭނާ ފާހަގަކުރެއްވިއެވެ.
މެންބަރު ވިދާޅުވީ ކޮވިޑް ބަލިމަޑުކަމުގެ ތެރޭގައިވެސް ބޭސް ލިބުން މިހާ ދަތިނުވާ ކަމަށާއި މިއީ ކުރީގެ އެއްވެސް ސަރުކާރެއްގައި ދިމާވި ކަމެއް ނޫން ކަމަށެވެ. ބޭހުގެ މައްސަލަ ހައްލުކުރުމަށް ސަރުކާރުން ކުންފުންޏެއް އުފައްދައި އެކި އެއްބަސްވުންތަކުގައި ސޮއިކުރި ނަމަވެސް އަދިވެސް މައްސަލައަށް ހައްލެއް ނުލިބެއެވެ. ރައީސް ޑރ. މުއިއްޒު ވަނީ ބޭހުގެ ދަތިކަމުގެ ސަބަބެއް ކަމުގައި "މެޑިކަލް މާފިއާ"އިން ގަސްތުގައި ބޭސް ނުގެންނަނީ ކަމަށް ވިދާޅުވެފައެވެ.
ކޮމެންޓު ފޮނުވާ