ރައީސުލްޖުމްހޫރިއްޔާ ޑރ. މުހައްމަދު މުއިއްޒު މި މަހުގެ 16 ވަނަ އަންގާރަ ދުވަހުގެރޭ ގަލޮޅުގެ ރައްޔިތުންނާ ބައްދަލުކުރައްވާން ނިންމަވައިފިއެވެ. ރައީސް ބާއްވަވަމުން ގެންދަވާ ރައްޔިތުންނާއި ގާތުން ބައްދަލުކުރައްވާ ސިލްސިލާ ބައްދަލުވުންތަކުގެ ތެރެއިން މިއީ އެންމެ ފަހުގެ ބައްދަލުވުމެވެ.
ގަލޮޅު ދެކުނު ދާއިރާގެ ކައުންސިލް މެންބަރު މަރިޔަމް ރީހާން ނާޒިމް ހާމަކުރެއްވި ގޮތުގައި، މި ބައްދަލުވުން އޮންނާނީ އަންގާރަ ދުވަހުގެރޭ 20:30 ގައި އިމާދުއްދީން ސްކޫލްގައެވެ. ގަލޮޅުގައި ދިރިއުޅުއްވާ ހުރިހާ ރައްޔިތުންނަށް މި ބައްދަލުވުމަށް ދައުވަތު އަރުވާފައިވެއެވެ.
ރައީސް މިފަދަ ބައްދަލުވުންތައް ބާއްވަވަނީ ރައްޔިތުން ކަންބޮޑުވާ ކަންތައްތައް ސީދާ އަޑުއައްސަވައި، އެކަންކަމަށް ޖަވާބު ދެއްވުމުގެ މަގްސަދުގައެވެ. މިހާތަނަށް ވިލިމާލެ، މައްޗަންގޮޅި، މާފަންނު އަދި ހެންވޭރުގެ ރައްޔިތުންނާއެކު މިފަދަ ބައްދަލުވުންތައް ކުރިއަށް ގެންގޮސްފައިވާއިރު، މި ބައްދަލުވުންތަކުގައި ރައްޔިތުންގެ ސުވާލުތަކަށް ރައީސް ޖަވާބު ދެއްވައި ޝަކުވާތައް އަޑުއައްސަވަމުން ގެންދަވައެވެ.
ކޮމެންޓު ފޮނުވާ